Тунисийн цэргийн шүүхээс эрх баригчдыг эсэргүүцсэн ард түмний бослогыг цус асгаруулан дарж, эх орноосоо дүрвэн гарсан дарангуйлагч Бен Алид бүх насаар нь хорих ял оноосон байна. Нэг жилийн өмнө Тунист гарсан эсэргүүцлийн бослого хөдөлгөөнөөр ард иргэд Ерөнхийлөгч асан Бен Алиг суудлаас нь түлхэн унагасны дараа тэрбээр Саудын Араб руу дүрвэн гарсан юм. Тунисийн засгийн эрхэнд олон жил ноёрхсон Бен Алигийн дэглэм нуран унасан нь Хойд Африк, Ойрхи Дорнодыг бүхэлд нь хамарсан “Араб хавар” хэмээх хувьсгалын шуурга дэгдээсэн билээ.

Тунист эрх баригчдаа эсэргүүцсэн жагсаал хөдөлгөөн дэгдсэн эхний долоо хоногт Кассерин, Тала хотод цагдаа нар 20 гаруй хүнийг буудаж хөнөөсөн юм. Тус улсын цэргийн шүүх ерөнхийлөгч асан Бен Алиг аюулаас хамгаалахынханд босогчдын эсрэг гал нээх тушаал өгсөн хэмээн буруутгасан юм. Бен Алигийн хэргийн яллагч экс-ерөнхийлөгчдөө цаазаар авах ял оноохыг шүүгчээс хүссэн боловч шүүх түүнд 20 жил хорих ял оноосон байна. Тунисийн экс-дарангуйлагчийн ял үүгээр дуусахгүй бөгөөд хар тамхи, зэвсэг хууль бусаар хил дамнуулан худалдаалсан, эрх мэдлээ урвуулан ашиглаж, улсын мөнгө завшсан хэргээр 66 жил шоронд хорих ял оноожээ. Тунис экс-дарангуйлагчид ялыг нь эдлүүлэхийн тулд түүнийг тус улсын талд шилжүүлэн өгөхийг Саудын Арабаас удаа дараа шаарджээ.

Тунист болсон эсэргүүцлийн хөдөлгөөний үеэр 300 гаруй хүн амиа алдаж, 2,000 гаруй хүн шархадсан юм.