Эрээн-Улаанбаатар-Байгаль нуур чиглэлд гурван улсын хил дамнасан “Цайны зам-2012” олон улсын авто ралли ирэх долдугаар сарын 15-22-нд болох гэж байна. Монголын автомашин, мотоциклийн холбоо, Өвөрмонголын биеийн тамир, спортын хороо, Буриадын автомашин спортын холбоотой хамтран зохион байгуулж буй тус авто ралли жийп болон УАЗ-469 гэсэн хоёр ангиллаар болох гэнэ. Уралдаан нийт зургаан гараанаас бүрдэх бөгөөд 2000 гаруй км замыг туулах юм байна. Ингэхдээ БНХАУ-ын Эрээн хотоос гараагаа хийж, Улаанбаатараар дамжин, ОХУ-ын Байгаль нуурын хөвөөд барианд орох ажээ.

“Цайны зам-2012” олон улсын уралдаанд Монгол Улаас ОУХМ Д.Болдбаатар, Х.Сүх-Очир, Г.Батзаяа, Ө.Бямбадэлгэр нарын шилдгүүд оролцохоор бүртгүүлжээ. Харин ОХУ-аас 10, БНХАУ-аас 20 гаруй төмөр хөлөгтөн хурд сорих гэнэ.

Уралдааны эхний гараа долдугаар сарын 16-нд Эрээн хотоос Сайншанд хүртэл 260 км үргэлжлэх бол хоёр дахь гараа Чойроос Улаанбаатар хүртэл 230 км, гурав дахь гараа Улаанбаатар-Дархан 260 км, дөрөв дэх гараа Дархан-Хиагт 140 км, тав дахь гараа Хиагт-Улаан-Үд 300 км, сүүлийн гараа Улаан-Үд-Байгаль нуур чиглэлд 300 км үргэлжлэх юм байна.

С.ЦЭЛМЭГ