Дуурь, бүжгийн эрдмийн театрын гадна өнөөдөр хөл хөдөлгөөн ихтэй байлаа. Камер үүрсэн телевизийн зураглаач, үзэг барьсан сэтгүүлч, дуран хараагаа шалган зогсох гэрэл зурагчид, тус театрын хамт олон нэгэн эрхэм хүнийг хүлээн авахаар ийнхүү театрын гадна чиглэн ирэх машин бүрийг догдлон хүлээж байсан юм. Энэ эрхэм хүндтэй хүн бол дэлхийн чансаатай дуурийн дуулаачдын уралдаанд түрүүлж, монголчуудыг баярлуулсан Гавьяат жүжигчин Э.Амартүвшин. Тэрбээр Бээжин хотноо болсон, Дэлхийн шилдэг тенор Пласидо Домингогийн нэрэмжит “The Placido Domingo’s Operalia” олон улсын дуурийн дуучдын уралдаанд оролцоод ийнхүү өнөөдөр  эх орондоо ирж байгаа юм. “Чингис хаан” олон улсын нисэх буудалд 10.50 цагт газардсан түүнийг УДБЭТ-ын захирал Б.Сэргэлэн тэргүүтэй театрын хамт олон, гэр бүлийнхэн нь угтан авчээ. Эх орондоо хөл тавьсан даруйдаа тэр төрөлх театртаа ирсэн юм.

Э.Амартүвшин хамгийн түрүүнд театрын тайзнаа мэхийн ёсолж, “Намайг ийм сайхан шагнал авахад урам зориг, дэмжлэг хайрласан Монголын нийт ард түмэндээ маш их баярлаж байна” хэмээн сэтгэлээ нээсэн. Монголын сонгодог урлагийг алтын дайтай үнэлүүлж чадсан тэрбээр театрын тайзнаа алтан цомоо өргөн зогсч, танхимд цугласан олон “браво, браво” хэмээн түүнд талархсан сэтгэлээ илэрхийлж, омогшин суугаа нь харагдсан.

Э.Амартүвшин, Монголын дуурийн урлагийг дэлхийд таниулаад ирсэн. Тэр үүнийг хийж чадсан, гартаа дээш өргөн зогсох алтан цом шигээ тэрбээр дахин гялалзлаа.