Австрали “Рио +20” дээд хэмжээний уулзалтын өмнө өөр хаана ч байхгүй далайн тусгай хамгаалалттай газар байгуулах болсноо мэдэгджээ. Австрали  Шүрэн тэнгист 3.1 сая км/кв талбайг  нөөц газар болгох гэнэ. Тус улсын Байгаль орчны яам далайн гуравны нэг хувийг эзлэх хэсгийг тусгай хамгаалалтын бүс болгож, загасчлал болон газрын тос, байгалийн хийн хайгуул, шинжилгээ явуулахыг хориглосон байна. Дээрх мэдэгдлийг хийсэн Австралийн Байгаль орчны сайд Тони Бурке ирэх долоо хоногт Бразилид болох байгаль орчны дээд хэмжээний уулзалтад Ерөнхий сайд Жуллиа Гиллардтай хамт оролцох юм байна. Тони Бурке “Далай тэнгисийг хамгаалах цаг нэгэнт болсон. Австрали далай, тэнгисийг хамгаалах агуу үйлс хийхээр бэлтгэж байна” гэжээ.

Бразилид удахгүй болох Байгаль орчны дээд хэмжээний уулзалтад дэлхийн 130 гаруй орны удирдагч, төлөөлөгч нар оролцож, байгаль орчны тулгамдсан асуудлууд, ялангуяа далай тэнгисийн усыг хамгаалах сэдвийг авч хэлэлцэх гэнэ. Далайн тусгай хамгаалалтын газар байгуулах төлөвлөгөөг хэдэн жилийн турш хэлэлцэж байгаа бөгөөд  эцсийн хэлэлцүүлгийн дараа хэрэгжүүлэх ажээ.

Австралийн Засгийн газар өнгөрсөн жил Шүрэн тэнгисийн ургамал, амьтан, орчныг хамгаалах төлөвлөгөөг танилцуулсан билээ. Австралийн зүүн хойд хойд эрэг Квинслэндийн далай аварга загас, алтан жад, халуун орны шүрэн арал, далайн ёроол дахь хавцлуудаар алдартай. Тус улсын Байгаль орчны яам далайн тусгай хамгаалалттай нутаг дэвсгэрийн тоог 27-60 болгож нэмэгдүүлэх гэнэ. Энэтхэгийн далай дахь Их Британийн эзэмшлийн 545,000 км/кв Чагос арал  далай, тэнгисийн хамгийн том тусгай хамгаалалттай газарт тооцогддог байна.