Лондонгийн олимпийн наадмын нээлтийн ажиллагааг зохион байгуулах комисс зарим нэг “нууц”-аасаа дэлгэлээ. Нээлтийн ёслолыг кино найруулагч Дэнни Бойл найруулж буй бөгөөд Английн хөдөөг харуулсан байдлаар цэнгэлдэхийн уур амьсгалыг бүрдүүлнэ гэжээ. Өвс ногоо, хонь хурга, үхэр, крикетийн талбай, ферм гээд олон зүйлийг багтаахаар төлөвлөсөн бөгөөд урлагийн тоглолтууд нь ч тийм хэв шинжийг агуулах юм. Наадмын нээлтэд оролцох 10500 тамирчин үүнийг тойрч зогсох аж.

Цэнгэлдэхэд 60 мянга, дэлхий даяар телевизээр нэг тэрбум гаруй хүн уг ёслолыг үзэх тооцоо гарчээ. Нээлтийн ёслолд оролцохоор 10 мянган сайн дурынхан бэлтгэлээ хийж эхлээд байна.