Азийн хөгжлийн банкны  ядуурлыг бууруулах Японы сангийн буцалтгүй тусламжийн хөрөнгөөр хэрэгжүүлэх гэж буй “Уур амьсгалд зохицсон хөдөөгийн амьжиргаа төсөл”-ийн хэлэлцээнд  Сангийн сайд Д.Хаянхярваа, Хүнс, хөдөө аж ахуй, хөнгөн үйлдвэрийн сайд Т.Бадамжунай, Азийн хөгжлийн банкны суурин төлөөлөгч Роберт М. Шоэллхаммэр нар өнөөдөр 15.30  цагт Сангийн яаманд гарын үсэг зурах гэж байна.

Малчдыг дэмжих энэ төсөл 2012-2016 оны хугацаанд нийт 2,5 сая ам.долларын буцалтгүй тусламжийн хөрөнгөөр хэрэгжих юм байна. Ингэхдээ Өвөрхангай аймгийн 10 сумд амжилттай хэрэгжиж дуусаад буй “Ядуу малчин өрхүүдэд зориулж уст цэг ба нэвтрүүлэх төв байгуулах төсөл”-ийн туршлага дээр үндэслэн хэрэгжүүлэх гэнэ.

Уг төсөл малчдын амьдралыг дээшлүүлэх, бэлчээрийн менежмент, уст цэгийн менежмент, малын өвс тэжээлийн болон өвөлжөөний бэлтгэлийг сайжруулах зорилготой ажээ.