Монголын лимбэний битүү амьсгааны арга барилыг ЮНЕСКО-гийн жагсаалтад бүртгэн тунхагласан батламжийг ЮНЕСКО-гийн Монголын Үндэсний Комисс, Монгол Улсын Засгийн газарт албан ёсоор хүлээлгэн өгөх ёслол өчигдөр Үндэсний дуу, бүжгийн эрдмийн чуулгын концертын танхимд боллоо. Уг батламжийг Монгол Улсын Засгийн газрыг төлөөлж, БСШУ-ны дэд сайд Б.Ундармаа гардан авч, эх хувийг Үндэсний Музейн харьяа Төрийн түүхийн музейд шилжүүлэн өгчээ. Монгол Улс энэ урлагаа ЮНЕСКО-д өнгөрсөн жил бүртгүүлсэн бөгөөд өдгөө батламжаа гардан авч байгаа юм. ЮНЕСКО-гийн Монголын Үндэсний Комиссийн Ерөнхий нарийн бичгийн дарга Г.Жаргалсайхан батламжийг Засгийн газарт гардуулан өгөхдөө лимбэний битүү амьсгааны арга барилыг ЮНЕСКО-гийн жагсаалтад бүртгүүлснээр Монгол Улс дэлхий нийтийн өмнө өндөр хариуцлага, үүрэг хүлээж байгааг цохон тэмдэглэжээ.

ЮНЕСКО-гийн Соёлын биет бус өвийг хамгаалах тухай Конвенцийн жагсаалтыг “Яаралтай хамгаалах шаардлагатай соёлын биет бус өвийн жагсаалт”, “Хүн төрөлхтний соёлын биет бус өвийн төлөөллийн жагсаалт” гэж хоёр ангилдаг байна. Одоогийн байдлаар энэ лимбэний битүү амьсгааны арга барилыг эзэмшсэн хорь хүрэхгүй лимбэчин байдаг гэнэ. ЮНЕСКО-гийн жагсаалтад орсон соёлын биет бус өвийг орчин цагтайгаа зохицон хөгжих чадвартай байх ёстой гэж шаарддаг тул уламжлал болон орчин үеийг хослуулан хөгжүүлэх замаар мэргэжлийн хүмүүс болон иргэдийг идэвхтэй хамруулахад тухайн улс онц ач холбогдол өгдөг байх ёстой гэнэ.

Лимбэний битүү амьсгааны уламжлалыг мэргэжлийн сургалтын хөтөлбөр, агуулгад тусгах үндэс суурийг анхлан тавьсан хүн бол алдарч лимбэч Л.Цэрэндорж агсан ажээ. Битүү амьсгаагаар лимбэдэх уран чадварыг өвлүүлэх энэ их үйлст Л.Маам, Гавьяат жүжигчин М.Дорж, М.Бадам, н.Галсантогтох, Ө.Батжаргал, лимбэч багш Д.Энхтайван нар түүхэн үүрэг гүйцэтгэсэн гэнэ. Лимбэ хөгжмийн мэргэжлийн сургалт эдүгээ Соёл урлагийн их сургууль, Хөгжим бүжгийн коллеж, Завхан аймаг дахь Хөгжим бүжгийн коллежид байдаг аж. 2007 онд лимбэний битүү амьсгааны уламжлалыг сэргээн хөгжүүлэх хойч үед өвлүүлэх зорилготой “Монголын Лимбэчдийн Холбоо” байгуулагдаж, энэ холбоонд үе үеийн лимбэчид, судлаачид, урлаг соёлын зүтгэлтнүүд нэгдэн орсон байна.