Нийслэлийн Баянгол дүүргийн нутаг дэвсгэр, III, IV хороололд байрлах "Баялаг" худалдааны төвд гарсан гал дүрэлзэн асч, дөрвөн давхар барилгын хоёр ба гуравдугаар давхар үндсэндээ шатжээ. Гал түймрийн дуудлага 10.20 цагт Онцгой байдлын газрын Шуурхай бүлэг 105 дугаарт ирсэн бөгөөд галыг унтраахаар Аврах, гал унтраах гурван ангийн алба хаагчид, дөрвөн техник хэрэгсэлтэй ажиллаж байна. Галын шалтгааныг тодруулахаар шинжээчид ажиллаж байгаа юм. Анх барилгын гуравдугаар давхраас хар утаа гарч буйг харсан иргэн Онцгой байдлын газрын Шуурхай бүлэгт мэдээлсэн байна.

"Баялаг" төвд "Ku"damm" ресторан, "Могул" дэлгүүр, "Гурван ган өд" авто сургууль, "Kenzo 999" паб, караоке, "Best Mother" сургалтын төв, "Shine" билльярдын төв, "I Love Movie" мини кино театр зэрэг олон газар үйл ажиллагаа явуулдаг байжээ. Барилгын дөрөвдүгээр давхарт байрладаг "Гурван ган өд" авто сургуулийн захирал О.Бат-Оргилын мэдээлснээр гуравдугаар давхарт үйл ажиллагаа явуулдаг "I Love Movie" кабинтай кино театраас эхлэн гал гарсан гэнэ. Гал дүрэлзэн асч, доод давхар руу тархсан, харин барилгын дөрөвдүгээр давхар, авто сургуулийн байрны тухайд шатсан нь гайгүй, угаар, тортог ихтэй байгаа гэнэ.

Гал гарах үед барилга дотор хүн байгаагүй тул галын улмаас гэмтэж, бэртсэн хүн үгүй ажээ. Гэхдээ их хэмжээний бараа, бүтээгдэхүүн галд шатаж, устсан байна. Одоогоор хохирлын хэмжээ тодорхойгүй байна.