Хувь хүний нууцын тухай хууль гэж бий. Иргэн миний нууцыг энэ хуулийн хүрээнд зохицуулах, хамгаалах учиртай. Харин миний нууцад хамаарах зүйлс гэвэл захидал харилцааны нууц, эрүүл мэндийн нууц, хөрөнгийн нууц, гэр бүлийн нууц зэрэг болно. Мэдээллийн аюулгүй байдал нүцгэн хүнээс ялгаагүй болсон энэ үед захидал харилцааны нууцаа хэрхэн хамгаалах нь нэгэнт иргэн миний хүрээнээс хэт хальсан асуудал болоод байна. Тухайлбал, биечлэн уулзах боломжгүй хэн нэгэн хүнтэй утсаар ярьсан тэр нууцаа хэрхэн хамгаалах вэ гэдгийг л бодоод үзэхэд болгоомжлох сэдэл өөрийн эрхгүй төрнө. Хэрвээ би гар утсаар өөрийн эрүүл мэндийн нууцын талаар хэн нэгэнтэй ярилцаж байтал нууц маань задарвал яах вэ. Хувь хүний болон гэр бүлийн нэр хүнд, аюулгүй байдлаас эхлээд эрсдэлд орох олон зүйл бий гэдэг нь ойлгомжтой.

Мэргэжилтнүүд “Технологийн хувьд гар утасны яриаг дундаас нь сонсох боломж хэдийн бий болсон хэдийч иргэдийн утсан харилцааны сүлжээнд хууль бусаар халдаж, яриаг дундаас нь хэн нэг этгээд сонсож байгааг мэдэх техникийн боломж нь одоогоор байхгүй” хэмээн ярьдаг. Харин би саяхан интернетээр мэдээлэл судалж байтал youtube-ээр ийм нэгэн видео мэдээг олж үзлээ их сонин л юм… Та бүхэн таны нууцыг хэрхэн хамгаалагдаж байгаа талаар сонирхвол ЭНД дарж үзнэ үү.

Харилцаа холбооны тухай хуульд оруулж байгаа нэмэлт өөрчлөлт, тодруулбал Харилцаа холбооны компаниудад чагнадаг төхөөрөмж суурилуулах, ийм төхөөрөмжгүй тохиолдолд техникийн бүрдэлгүй гэж үзэж үйл ажиллагаа явуулах зөвшөөрлийг нь хураах тухай хуулийн төслийг өнгөрсөн дөрвөн жилийн сонгуульт хугацаанд Засгийн газраас УИХ-д оруулж ирж байсан ч өнөөдрийг хүртэл огт дэмжлэг аваагүй байсаар дараагийн ээлжит сонгуультай учирлаа. Манай цахилгаан холбооны салбарт GSM систем дээр тулгуурлан үйл ажиллагаа явуулдаг компаниуд олон бий ч энэ салбарынхны үздэгээр уг технологи нууцлалын хувьд хэрэглэгчийн яриаг гаднаас нь хэн нэгэн сонсох боломж маш бага бөгөөд зөвхөн эзэнд нь яриаг хүргэдэг онцлогтой хэмээн тайлбарладаг. Магадгүй ирэх жилүүдэд гар утасны ярианы нууцлалыг хангах талдээр технологийн олон шийдлүүд гарах байх. Гэвч өнөөдөр та бидний нууцалдагдах, хувийн болон гэр бүлийн нэр хүндийг унагах асуудал үүсэхийг үгүйсгэхгүй. Тиймээс гар утасны оператораа сонгохдоо хувийн нууцыг хуулийн хүрээнд хэрхэн хангаж чадах вэ гэдгийг нь харж, харьцуулах шаардлагтай юм шиг санагдаж байгаагаа  уншигч тантай хуваалцлаа.