Баасан гаригийн шөнө нээлтээ хийсэн “Евро-2012” тэмцээний эхний дуулианы эзэд Данийн шигшээ баг боллоо. Тэмцээний хуваарь ёсоор “В” хэсгийн хоёр тоглолт өнгөрсөн шөнө болсон бөгөөд Мортен Ольсеноор удирдуулсан Данийн шигшээ баг 2010 оны дэлхийн аваргын мөнгөн медальт Нидерландын шигшээг 1:0 харьцаатай буулган авсан юм. Берт ван Марвейкийн удирдлага дор супер од тоглогчдоор багаа бүрдүүлсэн Голландын шигшээг тэмцээний гол фаворитуудын нэгээр нэрлэж байгаа. Гэвч эхний тоглолтдоо бүдэрсэн нь энэ байлаа.

Тэмцээний цорын ганц гоолын эзэн нь Микаэль Крон-Дели байв. Нутгийнхаа “Брондбю” багт хүчин зүтгэдэг тэрбээр Украйны Харьков хотын “Металист” цэнгэлдэхэд болсон тоглолтод Симон Пуольсений дамжуулалтаар 24 дэх минутад гоолдож, багтаа ялалт авчирсан юм. Ийнхүү “В” хэсэгт чансаагаар “гадуурхагдаж” байсан даничууд хэсгээ шатнаас шалгарах эхний боломжийг бий болгож чадлаа.

Ван Марвейкийн “Нисдэг голландчууд” дараагийн тоглолтоо зургадугаар сарын 14-ний үдэш 02.45 цагт Германы багтай хийнэ. Харин “Германы машинууд”-ын тухайд өнгөрсөн шөнө Украйны Львов хотноо Марио Гомезийн гоолын ачаар Португалийн шигшээ багийг буулган авсан байгаа.

Өнгөрсөн шөнө болсон хоёр дахь тоглолт “Евро-2012”-ын хэсгийн шатны хамгийн сонирхолтой учраа нарын нэг байлаа. “Европын Бразили” гэгддэг Португалийн шигшээ багийн амжилтыг багийн супер од Криштиан Рональдутай шууд холбон тайлбарлаж байгаа. Өнгөрсөн улиралд “Реал Мадрид”-ын бүрэлдэхүүнд 60 гоол оруулсан тэрбээр шигшээ багтаа хараахан гялалзаж амжаагүй л яваа. Тэрбээр олон улсын чанартай томоохон тэмцээнд шигшээ багтаа 19 тоглолтод ердөө тавхан удаа гоолджээ.

Гоолын моментыг нэг бус удаа бий болгож Германы багаас 72 дахь минутад Марио Гомез гоол оруулсан. Баруун жигүүрээс Сэми Хедирагийн хөндлөн дамжуулалтыг хүлээн авч, Руй Патрисиугийн хаалганд хожлын гоол оруулсан юм.

“В” хэсгийн дараагийн тоглолтууд 14-ний шөнө болох бол өнөөдөр үдэш “С” хэсэгт сугалаа таарсан багууд эхний тоглолтоо хийнэ. Польшийн Гданьск хотноо 00.00 цагт Испани, Италийн багийн тоглолт болох бол 02.45 цагт Ирланд болон Хорватын шигшээ багийн тоглолт эхлэх хуваарьтай.