111 дэхь жилдээ зохиогдож буй “Ролланд Гаррос” буюу Францын нээлттэй тэмцээний эрэгтэйчүүдийн ганцаарчилсан төрлийн шигшээд дэлхийн тэргүүн теннисчин Сербийн Новак Жокович болон Испаний Рафаэль Надаль нар шалгарлаа. Жокович Швейцарийн Рожер Федерерийг 6:4, 7:5, 6:3-аар, Испаний Рафаэль Надаль нутаг нэгт Дэвид Феррерийг 6:2, 6:2, 6:1-ийн харьцаагаар илүүрхэж ялалт байгууллаа. Дэлхийн чансааны хоёрт эрэмбэтэй Испаний Рафаль Надаль “Их дуулга”-ын арван цом хүртэхдээ Францын нээлттэй тэмцээнээс зургаан том цом хүртээд байгаа билээ. Тэрбээр 2005 оноос 2011 оны хоорондох зургаан түрүүг аваад байгаагаас 2009 онд дөрөвдүгээр тойрогт Швейдийн Содерлингт ялагдаж байжээ. 2005 оноос түүний тасралтгүй дөрвөн удаа түрүүлээд байсан амжилтыг Содерлинг зогсоож байсан байна. Гэсэн хэдий ч шороон талбайн хаан гэгддэг Рафаэль 2010, 2011 онуудад түрүүлээд байгаа билээ.

Дэлхийн тэргүүн теннисчин Жокович “Их дуулга”-ын таван цом хүртэхдээ Францын нээлттэй тэмцээнд түрүүлж чадаагүй байна.

Оны анхны “Их дуулга” болох Австралийн нээлттэй тэмцээний шигшээд  Жокович, Надаль нарын тоглолт таван сэт үргэлжиж зургаан цаг гаран тоглосоны эцэст (5:7, 6:4, 6:2, 6:7, 7:5) Жокович ялалт байгуулж байсан билээ. Жокович, Надалийг ээлжит тулаан маргааш орой болно.

Эмэгтэйчүүдийн ганцаарчилсан төрлийн цомын төлөө ОХУ-ын Мария Шарапова, Италийн Сара Эррина нарын өрсөлдөөн өнөө шөнө болно. “Их дуулга”-ын гурван түрүүт Мария Шарапова Францын нээлттэй тэмцээнд түрүүлж чадаагүй байгаа билээ. Тэрбээр энэхүү тэмцээнд хоёрт эрэмбэлэгдэн тоглож байгаа бөгөөд шөвгөрсөнөөр дэлхийн тэргүүн теннисчин хэргэмийг хүртэж байгаа юм. Түүний хувьд оны анхны “Их дуулга” болох Австралийн нээлттэй тэмцээний шигшээд Беларусын Виктория Азаренкад ялагдаж  (6:3, 6:0) байсан байна. Харин түүний өрсөлдөгч тус тэмцээнд 21-т эрэмбэлэгдэн тоглож буй Италийн Сара Эррина “Их дуулга”-ынхаа оргил амжилтыг үзүүлээд байна. Тэрбээр шигшээд шалгарахдаа олон шилдэгүүдийг буулган авч Шараповатай тунаж байгаа билээ.

Өчигдөр Сара нутаг нэгт Винситэй хосын шигшээ тоглолтод ОХУ-ын хос Мария Кириленко, Надия Петроваг 4:6, 6:4, 6:2-аар буулган авч “Их дуулга”-ын хосын анхны цомоо хүртлээ. Хосын төрлийн аваргууд 340 мянган еврогийн шагнал хүртэж байгаа бөгөөд чансааны 2000 оноо авсан байна. Италийн хосууд тус тэмцээнд дөрөвт, ОХУ-ын хосууд долоод эрэмбэлэгдэн тоглосон байна.

Италийн хосын хувьд оны анхны "Их дуулга" болох Австралийн нээлттэй тэмцээний шигшээ тоглолтод ОХУ-ын ОХУ-ын Светлана Кузнецова, Вера Звонарева нарын хосод ялагдаж  (7:5, 4:6, 3:6) байжээ.