Монгол Улсын Ерөнхийлөгч Цахиагийн Элбэгдорж 2012 оны 6 дугаар сарын 6, 7-нд болох Шанхайн хамтын ажиллагааны байгууллага ШХАБ-ын гишүүн орнуудын төрийн тэргүүн нарын зөвлөлийн XII хуралдаанд оролцохоор БНХАУ-ын нийслэл Бээжин хотноо хүрэлцэн ирлээ. Хуралдаанд гишүүн орнуудын төрийн тэргүүн БНХАУ-ын дарга Ху Жинтао, ОХУ-ын Ерөнхийлөгч В.Путин, Казахстан Улсын Ерөнхийлөгч Н.Назарбаев, БНКиргиз Улсын  Ерөнхийлөгч А.Атамбаев, Тажикстан Улсын Ерөнхийлөгч Э.Рахмон, Узбекистан Улсын Ерөнхийлөгч И.Каримов, ажиглагч орнуудын төрийн тэргүүн Иран Улсын Ерөнхийлөгч М.Ахмаденижад, Пакистан Улсын Ерөнхийлөгч А.Зардари, БНЭУ-ын  Гадаад хэргийн сайд С.Кришна, зочноор Афганистан Улсын Ерөнхийлөгч Х.Карзай, Туркменистан Улсын  Ерөнхийлөгч Г.Бердымухамедов болон ШХАБ-ын Ерөнхий нарийн бичгийн дарга М.Иманалиев нар оролцож байна.

ШХАБ-ын гишүүн орнуудын төрийн тэргүүн нарын зөвлөлийн XII хуралдаан 6 дугаар сарын 6-ны өдөр нээгдлээ. Нээлтийн ёслолын ажиллагааны үеэр Монгол Улсын Ерөнхийлөгч Ц.Элбэгдорж ОХУ-ын Ерөнхийлөгч В.Путин, Казахстан Улсын Ерөнхийлөгч Н.Назарбаев, Афганистан Улсын Ерөнхийлөгч Х.Карзай, Узбекистан Улсын Ерөнхийлөгч И.Каримов нарын зэрэг төрийн тэргүүнтэй  уулзаж, хоёр талын харилцаа, хамтын ажиллагаа болон хуралдаанаар яригдах асуудлуудаар санал солилцлоо. Энэхүү зөвлөлийн хуралдаанаар гишүүн орнууд Мөнхийн энх тайван, хамтын хөгжил цэцэглэлтийн бүс нутгийг байгуулах тухай Тунхаглал, ШХАБ-ын дунд хугацааны хөгжлийн стратегийн үндсэн чиглэл, Бүс нутгийн энх тайван, аюулгүй байдал, тогтвортой байдалд занал учруулах үйл явдлын үед авах улс төр, дипломатын арга хэмжээ болон механизмын журам зэрэг хэд хэдэн баримт бичигт гарын үсэг зурах төлөвтэй байна.