Пакистаны хойд нутагт Америкийн нисгэгчгүй аппаратаар Тагнуулын төв газраас хийсэн цохилтын зорилго нь “Аль-Каида” сүлжээний удирдлагын эрэмбээр хоёр дахь хүн болох Ливийн уугуул Яхья аль-Либийг устгах явдал байжээ. Энэ тухай Цагаан ордны эх сурвалж мэдэгдснээс иш татан Ассошиэйтед Пресс мэдээлсэн байлаа. Цохилтын үр дүн тодорхойгүй ч түүнийг зохион байгуулагчид нь “сэтгэл дүүрэн” байгаа гэнэ.

Афганистаны Баграм дахь Америкийн баазын шоронгоос 2009 онд зугтсан ливи гаралтай аль-Либийн толгойг тэр үеэр нэг сая ам.доллараар үнэлсэн байв. Түүнийг Афган эсвэл Пакистанд бүгсэн гэж үзэж байлаа. Усама бин Ладеныг устгасны дараа аль-Либи нь “Аль-Каидагийн” хоёр дахь хүн болсон юм. Тэр үеэр уг байгууллагын тэргүүнээр египет үндэстэн Айман аз-Завахири сонгогдсон байжээ.

Синьхуа агентлаг мэдээлснээр даваа гаригийн довтолгоо “Талибан” хөдөлгөөний 16 дайчинг устгасан байжээ. Пакистан ийм цохилтоор энгийн хүмүүс үрэгдэж байгааг эсэргүүцдэг. Харин америкчууд ажиллагааныхаа идэвхийг сулруулснаас биш бүрэн зогсоогоогүй.