Иргэний үнэмлэхээ хаяж, үрэгдүүлсэн, хүчингүй болгосон иргэдэд зурагтай лавлагааг УБЕГ-аас олгосон. 2011 оны арванхоёрдугаар сарын 26-ны өдрөөс энэ оны тавдугаар сарын 1-ний өдрийн хооронд лавлагаа авсан сонгуулийн насны 38183 /Улаанбаатар хотын хэмжээнд 25677, орон нутагт 12506 / иргэний цахим үнэмлэхийг хэвлэн аймаг, дүүргийн Улсын бүртгэлийн хэлтсүүдэд засаг захиргааны харьяаллынх нь дагуу өнгөрсөн сарын 29-ны өдөр хүлээлгэн өгөөд байгаа аж.

Энэ хугацаанд иргэний үнэмлэхийн лавлагаа авсан иргэд харьяа аймаг, дүүргийн Улсын бүртгэлийн хэлтэст хандан иргэний цахим үнэмлэхээ авах боломжтой болсон байна.

Харин тавдугаар сарын 1-ний өдрөөс зургадугаар сарын 1-ний хооронд иргэний үнэмлэхийн лавлагаа авсан сонгуулийн насны 56387 иргэний цахим үнэмлэхийг энэ дугаар сарын 10-ний дотор хэвлэж дуусгах юм байна. Улмаар энэ сарын 15-ны өдрийн дотор харьяа аймаг, дүүргийн улсын бүртгэлийн хэлтсүүдэд хүргүүлж, энэ сарын 25-ны өдрийг хүртэл иргэдэд олгож дуусгахаар төлөвлөжээ.