Өмнөговь аймгийн Булган, Мандал-овоо, Цогт-овоо, Ханхонгор сумдад аймгийн Мэргэжлийн хяналтын газраас тус сумдын ИТХ, ЗДТГазар, байцаагч мэргэжилтнүүд, эрүүл мэндийн төв, эмийн эргэлтийн сан, сургууль,цэцэрлэг, эрчим хүчний 4 салбар, 15 байгууллага, аж ахуйн нэгжийн 15 дэлгүүр, 18 хүнсний мухлаг, ЕБС-ийн “Үдийн цай” хөтөлбөр, хоол үйлдвэрлэлийн 11 цэг салбар, эмнэлэг, сургууль, цэцэрлэгийн гал тогоо, шатахуун түгээх 4 станц, ундны усны 6 эх үүсвэр, төвлөрсөн хог хаягдлын 4 цэгт хяналт шалгалт хийжээ. Хяналт шалгалтын явцад Мэргэжлийн хяналтын байгууллагын ойг тохиолдуулан дээрх сумдын 120 гаруй иргэд хөдөлмөрчидтэй уулзалт ярилцлага зохион байгуулж, “Мэргэжлийн хяналтын байгууллагын шинэчлэл”-ийн хүрээнд хийгдэж буй ажил үйлчилгээ, иргэд хөдөлмөрчдөд тулгамдаж буй асуудлуудад ганцаарчлан  хууль эрх зүйн болон мэргэжил арга зүйн зөвлөгөө өгч, “Нээлттэй хаалганы өдөр” зохион байгуулан 36 чиглэлийн хяналтын нийт 3600 гаруй авлага, брошюр тарааж, зарим асуудлыг газар дээр нь шийдвэрлэн ажилласан байна.

Хяналт шалгалтын нэгдсэн дүнг газрын даргын зөвлөлийн хурлаар хэлэлцүүлэн хяналт шалгалтын танилцуулга, илэрсэн зөрчил дутагдлыг арилгуулахаар улсын байцаагчдын хамтарсан 20 албан шаардлагыг сумдын Засаг дарга, эрүүл мэндийн төв, сургууль, цэцэрлэг, соёлын төв, худалдаа үйлчилгээний цэг салбаруудын удирдлагуудад хүргүүлэн нийт 566 500 мянган төгрөгний 23 нэр төрлийн 248 ширхэг чанарын шаардлага хангахгүй хугацаа дууссан хүнсний бүтээгдэхүүнийг улсын байцаагчийн 8 актаар хураан авчээ. Дээрх бүтээгдэхүүнүүдийг сумдын устгалын комисст шилжүүлж, 3159800 мянган төгрөгний захиргааны хариуцлага тооцон барагдуулсан байна.

 Мөн улсын байцаагчийн актаар их эрсдэлтэй үнэлэгдсэн 2 хоол үйлдвэрлэлийн газар, 1 талх нарийн боовны цехийн үйл ажиллагааг зөрчлийг арилгах хүртэл хугацаагаар зогсоожээ. Булган, Мандал-Овоо, Цогт-Овоо сумдын 2 талх нарийн боовны  цехээс 12, 1 сүү сүүн бүтээгдэхүүний цехээс 3 дээж, сумдын сургууль,цэцэрлэг, эрүүл мэндийн төвийн эдэлбэр газраас хөрсний дээж авч аймгийн стандарчлал хэмжил зүйн хэлтсийн итгэмжлэгдсэн лабораторид шинжлүүлэв хэмээн Өмнөговь аймгийн Мэргэжлийн хяналтын газраас мэдээлсэн байна.