Оросын рок дуучин, ая зохиогч, хөгжимчин, жүжигчин Виктор Цойг 1980-90-ээд оныхон андахгүй. Ази төрх, өвөрмөц хоолойгоороо тухайн үеийнхнийг байлдан дагуулж байсан Цойг шүтэн бишрэгчид Монголд олон бий. Тэгвэл Виктор Цойгийн 50 насны ойн хүрээнд түүний ажиллаж амьдарч байсан Ленинград хот буюу одоогийн Санкт-Петербург  хотын төвд  “Звезда по имени Цой” буюу  “Цой нэртэй од“ гэрэл зургийн үзэсгэлэн өнгөрсөн ням гаригт нээлтээ хийлээ. Түүний нэрэмжит гудамжинд нээгдсэн энэхүү үзэсэгэлэнд хар, цагаан 44 гэрэл зургийг дэлгэн тавьсан бөгөөд ирэх долдугаар асрын 21-нд  нэрт дуучин Виктор Цойгийн 50 насны төрсөн өдрөөр хаалтаа хийх юм байна. Энэхүү үзэсгэлэнгийн онцлог нь түүний хар цагаан гэрэл зургуудыг гудамжинд шилэн хоргонд байрлуулсан ба хоёр сарын турш бороо шороог үл харгалзан нийтэд үнэ төлбөргүй хүрэх юм байна. Эдгээр гэрэл зургууд үзэсгэлэнг дуусахаар Оросын урлагийн музейд залрах нь ээ.

Виктор Цой бол Оросын рок хөгжимд үнэтэй хувь нэмэр оруулсан дуучин. Тэрбээр анхныхаа дууг 17 настайдаа зохиож байжээ. Мөн анхныхаа тоглолтыг Ленинград хотноо хийсэн нь тухайн үедээ том шуугиан тарьж байсан билээ. Цой дуучин төдийгүй кино урлагт хүч үзэн өөрийн гэсэн мөрөө үлдээж амжсан юм. Оросуудын хийсэн тулаантай киноны гол дүрүүдийг бүтээж байсан тэрээр тун богино насалсан. 1990 оны наймдугаар сарын 15-нд 28 настайдаа автын осолд орж амь насаа алдсан юм.