Төрийн байгууллагуудын мэдээлэл, архивыг цахим орчинд шилжүүлэх болсонтой холбогдуулан төрийн албаны шалгалтыг хөдөө орон нутгийн иргэдээс интернэтээр авдаг боллоо. Одоогоор Баян-Өлгий, Орхон, Өвөрхангай, Баянхонгор, Дорноговь, Булган, Дархан-Уул аймгийн иргэд цахимаар шалгалтаа өгч эхэлсэн байна. 2013 он гэхэд бүх аймагт энэхүү цахим шалгалтыг нэвтрүүлэхээр зорьж байгаа гэнэ. Ийнхүү шалгалт өгөхийн тулд эхлээд бүртгүүлэх шаардлагатай бөгөөд бүртгэл цахим орчинд шилжсэн байна. Нийслэлийн хувьд төрийн албаны шалгалтыг 2011 оны арваннэгдүгээр сараас эхлэн интернэтээр авч эхэлжээ. Өөрөөр хэлбэл нийслэлийн иргэд цахимаар шалгалтаа өгөх бүрэн бололцоотой юм байна.

Энэхүү цахим системийг Төрийн албаны зөвлөлийн захиалгаар НҮБ-ын “Монгол Улсад шударга ёс, ил тод байдлыг бэхжүүлэхийг дэмжих төсөл”-ийн хүрээнд бүтээсэн гэнэ. Ийнхүү төрийн албаны шалгалтын талаарх бүхий л үйл явц, мэдээлэл цахимд орчинд шилжснээр тухайн байгууллагад хэдэн иргэн бүртгүүлж, ямар оноо авсан талаар мэдээлэл дэлгэрэнгүй гарах юм. Энэ нь шалгалтын ил тод байдлыг хангаж байгаа бөгөөд аливаа маргаан үүсэхээс сэргийлсэн чухал ажил хэмээн Төрийн албаны зөвлөлөөс онцолж байна.

Энэ жилийн эхний дөрвөн сарын байдлаар  Төрийн албаны шалгалтыг 16 удаа авч, нийт 1371 иргэн бүртгүүлсэнээс 731 нь тэнцсэн байна. Үүнээс нэгдүгээрт шалгарч, томилогдсон 178 иргэн, 553 иргэн нөөцөд үлдсэн ажээ.

Төрийн албаны шалгалтыг буюу яам, тамгын газар, түүний харьяа агентлагууд гээд бүхий л төрийн байгууллагуудад анх орохын тулд өгдөг бөгөөд тухайн үедээ төрийн аливаа байгууллагад ажиллах хүчний хэрэгцээ гарсан тохиолдолд шууд зарладаг байна.