Талбайн теннисний оны хоёр дахь “Их дуулга” болох Францын нээлттэй тэмцээн ес дэх өдрөө үргэлжиж байна. 1891 оноос гараагаа эхэлж өдгөө 111 дэх жилтэй золгож буй тус тэмцээний тэмцээний шагналын сан 17,71 сая евро ажээ.

Тэмцээний дөрөвдүгээр тойргийн тоглолтууд үргэлжилж байна.

Эмэгтэйчүүдийн хувьд 2012 оны Австралийн нээлттэй тэмцээний аварга, дэлхийн тэргүүн теннисчин Беларусийн Виктория Азаренка чансааны 15-т эрэмбэлэгдсэн Словакын теннисчин Доминика Цибулковид хоёр үеийн турш 2:6, 6:7-аар ялагдал хүлээлээ. Дэлхийн тэргүүн теннисчнийг буулгаж авсан Цибулкови дараагийн тойрогт чансааны зургаад эрэмбэлэгдсэн Австралийн тэргүүн теннисчин Саманта Стосуртой оноолт таарлаа. Цибулковигийн хувьд "Их дуулга"-ын ганцаарчилсан төрөлд хамгийн өндөр амжилтыг "Уимбльдон"-д үзүүлж байсан байна. Тэрбээр өнгөрсөн жилийн "Уимбльдон"-ы наймны нэгийн шигшээд шалгарсан ч ОХУ-ын Мария Шараповад ялагдаж (6:1, 6:1) байжээ. Хэрвээ тэрбээр дараагийн тойрогт өнгөрсөн жилийн Америкийн нээлттэй тэмцээний аварга Стосурыг хожиж чадвал шигшээд шалгарах боломж улам ойртох билээ. Саманта Стосурын хувьд чансааны 79-д эрэмбэлэгдсэн АНУ-ын Стивенсийг 7:5, 6:4-ээр буулган авсан байна.

2009 оны Францын нээлттэй тэмцээний аварга, чансааны 26-д эрэмбэлэгдсэн ОХУ-ын теннисчин Светлана Кузнецова чансааны 21-т эрэмбэтэй Италийн Сара Эринад 0:6, 7:5-ийн харьцаагаар ялагдал хүлээлээ. Италийн Эринагийн хувьд 2012 оны Австралийн нээлттэй тэмцээний 1/8-д шалгарч мөн хосын төрөлд дэд аварга болж байсан билээ. Тэрбээр дараагийн тойрогт чансааны аравт эрэмбэлэгдэж буй Германы Кербертэй оноолт таарлаа.

Тэмцээнд түрүүлэх магадлалтай теннисчдийн тоонд орж буй ОХУ-ын Мария Шарапова, Хятадын Ли На болон Чехийн Квитова нарын шилдгүүдийн дөрөвдүгээр тойргийн тоглолт өнөө шөнө болно.

Эрэгтэйчүүдийн хувьд Дэлхийн тэргүүн теннисчин Сербийн Новак Жокович болон Швейцарийн Рожер Федерер нарын шилдгүүд наймны нэг шигшээд шалгараад байна.

Жокович дөрөвдүгээр тойрогт чансааны 22-т эрэмбэлэгдсэн Италийн Андреаса Сэппиг дөрвөн цаг 18 минут тоглосны эцэст 4:6, 6:7 /5:7/, 6:3, 7:5, 6:3-аар буулгаж авлаа. Италийн Сэппи эхний хоёр сэтийг өөрийн болгосон ч сүүлийн гурван сэтэд ялагдал хүлээснээр тэмцээнээ дуусгалаа. Жоковичийг буулгах дөхсөн Итали эр ОХУ-ын Николей Даведенко (47) болон Испанийн Фернандо Вердассо нарын шилдэгүүдийг буулган авч Жоковичтой оноолт таарсан билээ. Өдгөө дэлхийн чансааны 22-т эрэмбэлэгдэж буй түүний хувьд "Их дуулга"-ынхаа хамгийн өндөр амжилтыг үзүүллээ.

Жокович дараагийн тойрогт чансааны тавд эрэмбэлэгдэж буй Францын Жо Уильфред Цонгатай учраа таарлаа. Цонга Швейцарийн Вавринкойг (18) 6:4, 7:6, 3:6, 3:6, 6:4-ийн харьцаагаар буулган авлаа.

“Их дуулга”-ын 16 түрүүт Швейцарийн Рожер Федерер чансааны 106-д эрэмбэлэгдсэн Белгийн Дэвид Гоффинийг 5:7, 7:5, 6:2, 6:4-ийн харьцаагаар буулган авлаа. 22 настай Белгийн залуу од Гоффин анхныхаа "Их дуулга"-д оролцож дөрөвдүгээр тойрог хүрэхдээ Чехийн Радек Штепаник (27) Швапхик, Францын Клемано (109), Польшийн Кубет (49) нарын шилдэгүүдийг буулган авч Федерертэй оноолт таарсан байна. Федерер дараагийн тойрогт чансааны долоод эрэмбэлэгдэж буй Аргентиний Хуан Мартин Дель Потротой оноолт таарлаа.  Хуан Мартин Дель Потро Чехийн Томаш Бердыхыг (9)  7:8, 1:6, 6:3, 7:5-ийн харьцаагаар буулган авсан байна. Федерер, Потро нарын хувьд 2009 оны Америкийн нээлттэй тэмцээний шигшээд таарч байхад Потро илүүрхэж анхныхаа "Их дуулга"-ын цомыг хүртэж байсан билээ.

Нөгөө хэсгээс Испанийн Николей Альмогри Сэрбийн Янко Типсаревичийг 6:4, 6:4, 6:4-ийн харьцаагаар, чансааны зургаад эрэмбэлэгдсэн Испанийн Дэвид Феррер нутаг нэгт Марсэл Гранолрсийг 6:2, 6:2, 6:0-ийн харьцаагаар буулган авсан бөгөөд энэхүү тоглолт ердөөн нэг цаг 51 минут үргэлжилсэн байна.

Дөрөвдүгээр хэсгийн сүүлийн тоглолтууд болох Их Британы Энди Муррей чансааны 17-д эрэмбэтэй Францын Гаскетэй, Испанийн Рафаэль Надаль чансааны 17-д эрэмбэтэй Аргентиний Хуан Монакотой тоглох билээ.