Монголын говиос олдсон гэх үлэг гүрвэлийн олдворын гарал үүслийг тогтоох шүүх хурал өнгөрсөн баасан гаригт АНУ-ын Даллас хотын шүүхэд болох байсан ч түр хугацаагаар хойшилжээ. Одоогоос 75 сая жилийн тэртээ амьдарч байсан Тиранозавр батаарын араг ясыг өнгөрсөн тавдугаар сарын 20-нд Нью-Йорк хотын “Heritage Auctions” дуудлага худалдааны газраас гарал үүслийг нь тогтоосны дараа худалдан авагч, хууль ёсны эзэмшигчид буцааж олгох нөхцөлтэйгээр нэг сая ам.доллараар худалдсан юм.

80 хувь нь бүтнээрээ олдсон ховор олдвор ямар замаар “Heritage Auctions”-д ирсэн тухай мэдээллийг тус байгууллагын зүгээс энэ хэрэгт ажиллаж буй өмгөөлөгч Роберт Пейнтэд өгсөн байна. Ингээд Монгол Улсын Ерөнхийлөгч Ц.Элбэгдоржийн томилсон өмгөөлөгч тус байгууллагатай хамтран ажиллахаар болжээ. Төв Азиас л олддог Т-рекс аварга үлэг гүрвэлийн өвөг Тироназавр батаарын араг яс япон худалдаачны гар дамжин ирсэн гэж “Heritage Auctions” мэдэгдсэн гэнэ. Монголын төдийгүй олон улсын палентеологич эрдэмтэн, судлаачид дуудлага худалдаагаар зарагдсан Тироназавр батаарын араг ясыг Монголын говиос олдсон гэдэгт эргэлзэхгүй байгаа ч “Heritage Auctions” уг олдвор АНУ-ын хилээр зохих хууль журмын дагуу нэвтрүүлсэн гэж үзэж байгаа юм.

“Heritage Auctions”-д тавьсан уг олдворыг үзэж, шинжлэхээр Монгол Улсын Ерөнхийлөгчийн ахлах зөвлөх П.Цагаан, палеонтологич эрдэмтэн н.Цогтбаатар тэргүүтэй төлөөлөгчид өчигдөр Нью-Йоркийг зорьжээ.