Казахстаны Алматы хотноо үргэлжилж буй Ази тивийн залуучуудын чөлөөт
бөхийн аварга шалгаруулах тэмцээний хоёр дахь өдөр буюу өчигдөр Монголын
гурван бөх тивийн аваргын дэвжээнд гарсан ч медалийн тавцанд гарч
чадсангүй. Хуваарийн дагуу өчигдөр эмэгтэйчүүдийн 49, 55, 63, 72 кг,
эрэгтэйчүүдийн 50 ба 120 кг-ын жинд аваргууд тодорсон юм. Монголын
тамирчдын тухайд 50 кг-ын жинд Б.Майдар, эмэгтэйчүүдийн 55 кг-д
А.Батцэцэг, 63 кг-ын жинд Ц.Шинэхүүхэн нар барилджээ. Харин тэмцээний эхний өдөр эмэгтэйчүүдийн 51 кг-д Э.Даваачимэг мөнгө, 67 кг-д О.Оюунтуяа хүрэл медаль хүртсэн билээ.

Б.Майдар эхний тойрогт Энэтхэгийн бөх Деви Сингхтэй барилдаж, 2:0, 0:1,
0:1 харьцаатай ялагдсан бол эмэгтэйчүүдийн 63 кг-д Ц.Шинэхүүхэн мөн
эхний тойрогт Вьетнамын бөх Пам Ти Лоанд 0:1, 0:3 харьцаатай дийлдсэнээр
тэмцээнээ дуусгасан байна. Харин эмэгтэйчүүдийн 55 кг-д А.Батцэцэг
нэгдүгээр тойрогт Узбекистаны бөх Шокиста Тошбулатоваг 6:3, 3:0 онооны
харьцаагаар, дараа нь Хятадын Нин Тунсьюэг 1:0, 3:0-ээр ялж, хэсгийн
аваргын төлөөх барилдаанд Вьетнамын бөхөд ялагджээ. Ингээд хүрэл
медалийн төлөө Энэтхэгийн бөх Риту Ритуд 1:1, 1:4 харьцаагаар ялагдсан
байна.

Өнөөдөр эрэгтэйчүүдийн 55, 60, 66, 74, 84, 96 кг-ын жингийн барилдаан болсноор тэмцээн өндөрлөх юм.