Гадаад харилцааны яамны Төрийн нарийн бичгийн дарга Б.Батхишиг Бүгд Найрамдах Ардчилсан Социалист Шри Ланка Улсаас Монгол Улсад хавсран суух Онц бөгөөд Бүрэн эрхт Элчин сайд Ранжит Уянгодаг Монгол Улсын Ерөнхийлөгч Ц.Элбэгдоржид Итгэмжлэх жуух бичгээ барьсантай нь холбогдуулан хүлээн авч уулзав. Талууд хоёр улсын хооронд дипломат харилцаа тогтоосны 50 жилийн ой энэ 2012 онд тохиож буйг онцлоод, хоёр талын харилцааг цаашид боломжит салбаруудад өргөжүүлэн хөгжүүлэх чиглэлээр ярилцаж, өөрсдийн орны нийгэм эдийн засгийн хөгжлийн талаар харилцан мэдээлэл солилцлов.

Элчин сайд Ранжит Уянгода хоёр талын харилцааг идэвхижүүлэх үүднээс дээд өндөр түвшний харилцан айлчлалыг хэрэгжүүлэх, батлан хамгаалах, мэдээлэл технологи, боловсролын салбар хийгээд хувийн хэвшлийн хоорондын харилцааг хөгжүүлэхэд хүч чармайлт гаргаж ажиллахаа илэрхийлэв. Тэрээр дипломат харилцаа тогтоосны 50 жилийн хүрээнд Монгол Улсын Ерөнхийлөгч Ц.Элбэгдоржийг Шри Ланка Улсад айлчлахыг урьсан өөрийн улсын Ерөнхийлөгч Махиндра Ражапаксагийн урилгыг уламжлаад айлчлалыг хэрэгжүүлнэ гэдэгт найдаж байгаагаа илэрхийлэв.

Монголд Буддын шашин дэлгэрэх үеэс монголчууд ном судраас Шри Ланка Улсын талаар анхны мэдээлэл авч, Арслан тив хэмээн нэрлэж байжээ. Хоёр орон 1962 оны 2 дугаар сарын 1-ний өдөр дипломат харилцаа тогтоосон.