Энэ жилийн УИХ-ын сонгуулийн нэг онцлог нь Монгол Улсын гадаадад байгаа иргэд сонгуульд оролцох боломжтой болсон юм. Тэд УИХ-ын сонгуульд оролцохоо албан ёсоор мэдэгдсэн 11 нам, хоёр эвслийн төлөө саналаа өгөх эрхтэй. Монгол Улсаас гадаад орнуудад суугаа 39 дипломат төлөөлөгчийн газарт тавдугаар сарын 11-нээс эхлэн санал өгөх хүсэлтэй иргэдийг бүртгэж эхэлсэн бөгөөд бүртгэх хугацаа өчигдөр дуусчээ.

СЕХ-ноос өчигдөр мэдээлснээр 2500 иргэн санал өгөхөөр бүртгүүлжээ. Харин ГХЯ одоо эцсийн байдлаар дүнг нэгтгэж байгаа юм байна. Гадаад улсад байгаа сонгуулийн эрх бүхий иргэний саналыг санал авах өдрөөс 15-аас доошгүй хоногийн өмнө урьдчилан авч битүүмжлэн Сонгуулийн ерөнхий хороонд хүргүүлэхээр хуульд тусгаад буй. Тэгвэл зургадугаар сарын 10-нд санал авах өдрийг товлоод байна.