Улсын дуурь, бүжгийн эрдмийн театрт бас нэгэн гайхалтай зочин ирэх гэнэ. Түүнийг Ованес Айвазян гэдэг. Тэр бол Армян улсын авьяаслаг теноруудын нэг юм. Тэрбээр УДБЭТ-ын захирал, хатагтай Б.Сэргэлэнгийн урилгаар Монголын тайзнаа ирэх зургадугаар сарын 16-нд Ж.Пуччинийн “Тоска” дуурьд дуулахаар ирэх гэж байгаа юм. Тэрбээр “Тоска” дуурийн Каварадосси зураачийн дүрд тоглох юм. УДБЭТ-ын захирал Б.Сэргэлэн ОХУ-ын Москва хотод төвтэй, олон улсын залуу уран бүтээлчдийг дэмжих “Smolart” байгууллагын захирал Сергей Молчанов нар өнгөрсөн 2011 онд хамтын ажиллагааны гэрээ байгуулсан юм. Энэ хүрээнд авьяаслаг уран бүтээлч Ованес Айвазян манай улсад ирэх гэж байгаа юм. “Smolart” байгууллага нь сонгодог урлагийн уран бүтээлчдийг дэмжих, олны танил болгох үйл ажиллагааг олон улсын хэмжээнд явуулдаг. Ноён Сергей Молчанов 2011 оны 10-р сард УДБЭТ-т айлчилж, Дж.Вердийн “Аида” дуурийн тоглолтыг монголчууд хэрхэн бүтээснийг сонирхон, театрын удирдлага, уран бүтээлчидтэй уулзаж танилцсан.

Тенор Ованес Айвазян нь 1983 онд төрсөн. 2008 оноос эхлэн Армян улсын ДБЭТ-ын дуурийн гоцлоочоор ажиллаж буй. 2006-2011 онуудад Ереваны хөгжмийн консерваторийг дуурийн гоцлоочоор дүүргэсэн. Ереван, Москва, Санкт-Петербург хотуудад зохиогдсон үндэсний болон олон улсын хэмжээний уралдаануудад I,II байрын шагналуудыг хүртэж байсан. 2010 оноос Канад улсын Торонто хотын “Opera Belcanto of Simcoe” театрт Дж.Пуччинийн “Тоска” П.Масканийн “Тосгоны алдар” дууриудын гол дүрүүдэд олон удаа уригдан тоглосон.

Ованес Айвазяны бүтээсэн дүрүүд:

Дж.Бизе. «Кармен» — Дон Хозе
Дж.Верди. «Аида» —Радамес
Дж.Верди. «Риголетто» — Герцог Мантуанский
Дж. Верди. «Травиата» — Альфредо
Р.Леонкавалло. «Паяцы» — Канио
П.Масканьи. ««Сельская честь» — Турриду
Дж. Пуччини. «Мадам Баттерфляй» — Пинкертон
Дж. Пуччини. «Плащ» — Луиджи
Дж. Пуччини. «Тоска» — Каварадосси
П.И.Чайковский. «Евгений Онегин» — Ленский
Ованес Айвазян нь Монголд 2012 оны зургадугаар сарын 11-нд Бээжинд болох гэж  буй алдарт Плачидо Домингогийн нэрэмжит олон улсын “Опералия” уралдаанд оролцоод ирэх юм байна.