Талбайн теннисний оны хоёрдахь “Их дуулга” болох “Ролланд Гаррос” буюу Францын нээлттэй тэмцээний нэгдүгээр тойргийн тоглолт үргэлжиж байна. Эрэгтэйчүүдийн шилдэгүүдээс Австралийн Лэвит Хьюитт болон АНУ-ын Энди Роддик нар тэмцээнийг орхиод байна. 

“Их дуулга”-ын хоёр түрүүт Австралийн нэрт теннисчин Лэвит Хьюитт нэгдүгээр тойрогт Словений Блаж Кавчичтой оноолт таарсан билээ. Өдгөө дэлхийн чансааны 99-д эрэмбэлэгдэж буй Словен теннисчин Кавчич Хэвитийг 7:6, 6:3, 6:7, 6:3-аар буулган авсан байна. Харин тэрбээр хоёрдугаар тойрогт дэлхийн тэргүүн теннисчин Новак Жоковичтой оноолт таарлаа.

Мөн 2003 оны “Америкийн нээлтэй тэмцээн”-ий аварга АНУ-ын нэрт теннисчин Энди Роддик (26) нэгдүгээр тойрогт Францын Николасу Маюд (40) 3:6, 3:6, 6:4, 6:2-аар ялагдаж тэмцээнээ дуусгалаа. 2004, 2005, 2009 оны “Уимбльдон”-ы дэд аварга, дэлхийн тэргүүн теннисчин хэргэмийг хүртэж явсан, өдгөө дэлхийн чансааны 26-д эрэмбэлэгдэж Энди Роддик ирэх сард болох “Уимбльдон”-ыг л хүлээх хэрэг үлдлээ. Өдгөө дэлхийн чансааны 89-д эрэмбэлэгдэж буй Францын Маю дараагийн тойрогт Словакийн Клижантай учраа таарчээ.

Мөн ОХУ-ын Николой Давыденко (47) Италийн Сэппид 3:6, 6:7, 5:7-аар, Александр Богомолов (46) Францын Клеманад (139) 2:6, 6:3, 6:4, 6:7 (2:7) –аар ялагдал хүлээсэн байна.

Харин эмэгтэйчүүдийн хувьд дэлхийн тэргүүн теннисчин Беларусын Виктория Азаренка хүндхэн тоглолтыг хийж хоёрдугаар тойрогт шалгарлаа. 2012 оны “Австралийн нээлттэй тэмцээн”-д түрүүлж, оны эхнээс /01.30/ дэлхийн тэргүүн теннисчин хэргэмийг хүртэж яваа түүний хувьд нэгдүгээр тойрогт дэлхийн чансааны 105-д эрэмбэлэгдэж буй Италийн Альберто Бриантийг хоёр цаг гаруйн эцэст 6:7, 6:4, 6:2-аар буулган авлаа. Азаренка хоёр дахь сэтэд 4:0-ээр хожигдож явсан ч тоглолтыг гайхалтай эргүүлж тоглолтыг 6:4-ээр өөрийн болгосон билээ.

Италийн Пеннетта (18) Тайваны Су Вей Хсиег (64) 6:7 (3:7), 6:4, 6:2-аар, АНУ-ын Стивенс (79) дэлхийн чансааны 37-д эрэмбэлэгдэж буй ОХУ-ын Екатерина Макароваг 6:4, 7:6 (8:6)-ийн харьцаагаар буулган авсан байна.

"Ролланд Гаррос"-ын 2010 оны аварга, 2011 оны дэд аварга Италийн Франческо Скьявоне нэгдүгээр тойрогт дэлхийн чансааны 72-т эрэмбэлэгдэж буй өдгөө 42 настай Японы Кимко Датэ Крумотог 6:3, 6:1-ийн харьцаагаар буулган авсан байна.

Дэлхийн чансааны гуравт эрэмбэлэгдэж буй Польшийн Агнешка Радванска Сербийн Йовановскиг 6:1, 6:0-ийн харьцаагаар буулган авсан ч хоёрдугаар тойрогт “Их дуулга”-ын долоон түрүүт Винус Уильямстай оноолт таараад байна. Винус, Радванска нар өнгөрсөн гуравдугаар сард “Sony Ericsson Open”-ий хагас шигшээд таарахад Радванска 6:4, 6:1-ээр буулган авч байсан байна. Энэхүү тоглолт хоёрдугаар тойргийн хамгийн сонирхолтой тоглолтын нэг болоод байна.

Дэлхийн чансааны хоёрт эрэмбэлэгдэж буй ОХУ-ын теннисчин Мария Шарапова дэлхийн чансааны 78-д эрэмбэлэгдэж буй Румыний теннисчин Александру Каданцуг 6:0, 6:0-ийн харьцаагаар 48 минутад буулган авсан байна.

Францын Виржини Раззано АНУ-ын Серена Уильямсыг 4:6, 7:6, 6:3-ийн харьцаагаар буулган авлаа. Дэлхийн чансааны тавд эрэмбэлэгдэж буй, "Их дуулга"-ын 13 түрүүт АНУ-ын нэрт теннисчин Серена Уильямс чансааны 115-т эрэмбэлэгдэж буй Раззанод ялагдсан нь нэгдүгээр тойргийн хамгийн том дуулиан боллоо. Хэдийгээр Серена ганцаарчилсан төрлөөс хасагдаж байгаа ч холимог хосын төрөлд нутаг нэгт Боб Браунтой хослон тоглох билээ.

Маргаашаас “Их дуулга”-ын хоёрдугаар тойргийн тоглолт эхлэх билээ.