Сирийн Хул хотод 108 хүүхэд, эмэгтэйчүүд, эрчүүдийг хөнөөж, 300 хүнийг шархдуулсныг НҮБ эрс шүүмжилж, тогтоол гаргахаар зэхэж байна. Франц, Их Британийн санал болгосон уг тогтоолд “Сирийн Засгийн газрын арми танк, их буугаар энгийн номхон иргэдийг хядаж, мөн ойрын зайнаас онцгой харгислан хөнөөсөн байна” хэмээн буруушаажээ. Энэ талаар НҮБ-ын Хүний эрхийн дээд комиссар Нави Пиллэй “Нутгийн хүн амыг толгой дараалан зориудаар хөнөөж байгаа нь хүн төрөлхтний эсрэг үйлдэж буй гэмт хэрэг” хэмээгээд, энгийн иргэдийн эсрэг хүч хэрэглэхээ зогсоохыг Сирийн Засгийн газарт уриалав. Дээрх тогтоолыг НҮБ-ын Аюулгүйн зөвлөлийн 15 гишүүн бүгд баталсан байна.

ОХУ эхлээд уг тогтоолыг дэмжихээс татгалзаж, “Үү­­­­­­­­нийг Ерөнхийлөгч Башар Аса­дын эсрэг явуулга, өдөөн хат­галга байж магадгүй” хэмээж байв. НҮБ дэх Оросын байнгын төлөөлөгчийн орлогч Александр Панкин “Сирийн Засгийн газрын арми тийшээ огт очоогүй” хэмээн, эрх баригчдаа дэмжлээ.

НҮБ болон Арабын лигийн орнуудын тусгай төлөөлөгч Кофи Аннан зөрчлийг зохицуулахаар өчигдөр Дамаск хотод очиж, Сирийн Ерөнхийлөгч Асадтай биечлэн уулзсан байна. АНУ дээрх харгислалыг ашиглан, Сирийн Ерөнхийлөгч Башар Асадыг Йемений хувилбараар түлхэн унагах талаар Оростой тохиролцохыг хүсч байгаа талаар Израилийн “The Jerusalem Post”, АНУ-ын “Нью-Йорк Таймс”, “Таймс” сонин бичжээ. Энэ талаар Оросын депутат, Ерөнхий сайд Д.Медведевийн туслах Михаил Маргелов “Сирийн Засгийн газар хэн нэгэнд таалагдахгүй байж болно. Саяхан энд болсон сонгуулийг өөр өөрөөр үнэлсэн ч болно. Гэхдээ өнөөгийн Засгийн газрыг өөрчилж солих асуудлыг бид шийдэхгүй” хэмээжээ.

Дашрамд сонордуулахад “Росбалт” сайтын мэдээлс­нээр Сирийн босогчид тавдугаар сарын 25-нд улсынхаа өндөр албан тушаалтнуудад хор өгч алахыг оролдсон байна. Тэдний дунд Сирийн Батлан хамгаалахын сайд Дауд Ража, дэд сайд Асеф Шаукат, Дотоод хэргийн сайд Мухаммад аш Шаар, Асадын дүүгийн нөхөр Бушр нар байжээ. Тэд эмнэлгийн тусламж яаралтай авсны хүчинд амьд үлдсэн байна.