Дэлхийн аварга Испанийн хөлбөмбөгийн шигшээ багийн дасгалжуулагч Висенте дел Боске “Евро-2012”-ыг зорих багийн бүрэлдэхүүнээ эцсийн байдлаар танилцууллаа. Тэрбээр Сербийн шигшээтэй хийсэн нөхөрсөг тоглолтод гоолдсон хоёр довтлогчийг хасч, “Барселона”-гийн Педрог багтаа дууджээ.

2008 оноос эхлэн “Ялагдашгүй Армада”-г удирдаж, тив, дэлхийн аварга болгосон хашир дасгалжуулагч “Валенсия”-гийн Роберто Солдадо, “Атлетико Мадрид”-ын Адриан Лопез гэсэн хоёр довтлогчийг “гэрт нь үлдээх” шийдвэр гаргасан нь гайхашрал, шүүмжлэл дагуулж байна. Сербийн шигшээ багтай нөхөрсөг тоглолт хийхэд эсрэг багийнхаа хаалганд гоолдож, форм сайтай буйгаа харуулсан ч Дел Боскегийн сонголт Педро Родригез байлаа. Испанийн шигшээ багийн бүрэлдэхүүнд энэ удаад Карлос Пуйоль, Давид Вилья нар багтаагүй. Хамгаалалтын гол ноён нуруу болсон Пуйоль, Испанийн бүх цаг үеийн мэргэн бууч Давид Вилья нар гэмтлийн улмаас “Евро-2012”-ыг өнжих юм.

“Евро-2012” тэмцээнд оролцох Испанийн багийн бүрэлдэхүүнийг танилцуулъя.

Хаалгач: Икер Касильяс /Реал Мадрид/, Пэпэ Рейна /Ливерпуль/, Виктор Валдез /Барселона/
Хамгаалагч: Раул Албьол /Реал Мадрид/, Альваро Арбелоа /Реал Мадрид/, Серхио Рамос /Реал Мадрид/, Жорди Альба /Валенсия/, Хуанфран Торрес /Атлетико Мадрид/, Жерар Пике /Барселона/, Хави Мартинез /Атлетик Билбао/
Хагас хамгаалагч: Серхио Бускетс /Барселона/, Сеск Фабрегас /Барселона/, Хави /Барселона/, Андрес Иньеста /Барселона/, Хаби Алонсо /Реал Мадрид/, Санти Касорла /Малага/, Давид Силва /Манчестер Сити/, Хесус Навас /Севилья/, Хуан Мата /Челси/
Довтлогч: Педро /Барселона/, Альваро Негредо /Севилья/, Фернандо Торрес /Челси/, Фернандо Льоренте /Атлетик Билбао/

Испанийн шигшээ баг “Евро-2012”-ын хэсгийн эхний тоглолтоо зургадугаар сарын 10-нд Италийн шигшээ багтай хийнэ. Дашрамд дуулгахад, “Ялагдашгүй Армада” Висенте дел Боскегийн удирдлага дор нийт 51 тоглолт хийснээс 43 удаа ялалт байгуулж, хоёр тоглолтод тэнцэж, зургаан удаа хожигджээ.