Цагдаагийн ерөнхий газрын дарга, хошууч генерал Д.Сандаг-Очир БНТУ-аас Монгол Улсад суугаа Онц бөгөөд Бүрэн Эрхт Элчин Сайд ноён Асим Арарыг хүлээн авч уулзжээ. 1997 онд Монгол Улсын Цагдаагийн ерөнхий газар, Бүгд Найрамдах Турк улсын Дотоод явдлын яамтай хамтран ажиллах чиглэлээр гэрээ хэлэлцээр байгуулагдсан. Энэ үеэс хоёр орны цагдаа, дотоодын цэргийн байгууллагуудын хамтын ажиллагаа идэвхтэй хөгжиж, Туркийн Цагдаагийн академид жил бүр манай улсын 5 сонсогчийг суралцуулан, төгсөгчид цагдаагийн байгууллагын албадад үр бүтээлтэй ажиллаж байгаа ажээ.

Түүнчлэн Турк Улсын санаачлагаар “Олон улсын Цагдаагийн академиудын холбоо” /INTERPA/-г байгуулж манай  улсын Цагдаагийн Академи тус байгууллагад гишүүнээр элсэж 2003 онд Туркийн Цагдаагийн академитай хамтын ажиллагааны гэрээ байгуулсан байна. Одоо хоёр улсын цагдаагийн байгууллага нь улс дамнасан мансууруулах бодис, зохион байгуулалттай гэмт хэрэгтэй тэмцэхэд хамтран ажиллаж, Турк улсад зохион байгуулж буй олон улсын арга хэмжээ, сургалтанд Монгол улсын цагдаагийн  байгууллагын алба хаагчид оролцохоор болсон байна.