Монголын үндэсний номын сан ОХУ-ын Буриад улсын үндэсний номын сантай
хамтран Чингис хааны тухай мэдээллийн нэгдсэн цахим номын сан
байгуулахаар болжээ. Мэдээллийн нэгдсэн сүлжээ бүхий цахим сан бий
болгох саналыг анх буриадын тал тавьсан гэнэ. Тус улсын нэгдсэн номын
санд Чингис хааны тухай цахим номын санг 2005 онд байгуулж байсан бөгөөд
өдгөө академич С.Козины 1941 онд орос хэлнээ хөрвүүлсэн “Монголын нууц
товчоо”, В.Янын “Чингис хаан” романаас эхлээд хааны тухай хэвлэгдсэн
эрдэм шинжилгээний болон уран зохиолын 628 бүтээл байдаг аж.