Латин Америкийн Венесуэл улс ирэх аравдугаар сард хоёр дахь хиймэл дагуулаа хөөргөнө хэмээн тус улсын Шинжлэх ухаан, технологийн яамны сайд мэдэгдлээ. Тус хиймэл дагуулыг Хятадын зоогч пуужингаар сансрын тойрог замд оруулахаар төлөвлөж байгаа аж. “Миранда” хэмээн нэрлэсэн энэ хиймэл дагуул дэлхийн гадаргыг ажиглах зориулалттай бөгөөд үүний өмнө хөөргөсөн “Симон Боливар” хиймэл дагуул эдүгээ тойрог замд ажиллаж байгаа юм. “Симон Боливар” хиймэл дагуулыг Хятадад зохион бүтээсэн аж. Одоо хөөргөж байгаа “Миранда” дагуул нь 140 сая орчим ам.долларын өртгөөр бүтсэн ажээ.

Венесуэлийн сайдын мэдэгдсэнээр бол энэ хиймэл дагуул нь өдөр шөнийн 24 цагт улс орныхоо нутаг дэвсгэрийг ажиглаж, дүн шинжилгээ гаргаж байх ёстой гэжээ. “Миранда” гэдэг нь Өмнөд Америкийг Испанийн колоничлолоос чөлөөлөхийн төлөөх тэмцлийн удирдагч Франсиско де Мирандагийн нэр бөгөөд тэр бол Венесуэлийн үндэсний баатар юм.

2008 онд Хятадын нутаг дэвсгэрээс хөөргөсөн Венесуэлийн анхны хиймэл дагуул “Симон Боливар”-ыг мөн л Испанийн түрэмгийлэгчдийн эсрэг тэмцэгч Симон Боливарын нэрээр нэрлэжээ. “Симон Боливар” хиймэл дагуул нь радио холбоо, телевизийн дахин дамжуулалт болон иргэний зориулалттай ажээ.