Банкны хуурамч төлбөрийн карт ашиглан манай томоохон банкны бэлэн мөнгөний машинаас /АТМ/ их хэмжээний мөнгө залилан нутаг буцах гэж байсан гадаадын хоёр иргэнийг баривчилсан  байна. Тавдугаар сарын 23-ны орой “Их хэмжээний мөнгө алдагдлаа” гэх мэдээлэл ирсний дагуу  банкны камерын бичлэгийг цагдаагийн ажилтнууд шүүсэн байна. Бичлэг харсаны дараа гадаад руу нисэх онгоцны бүртгэлийг шүүж, ХХЕГ, ГИХА-ын ажилтнуудын тусламжтайгаар гэмт этгээдүүдийг илрүүлжээ. Тэднийг гадаад иргэд ихэвчлэн ордог буудлуудаар хайж Сүхбаатар дүүрэгт байрладаг “Өвөрмонгол” зочид буудалд байхад нь тавдугаар сарын 24-ны 02 цагийн үед баривчилжээ. Тэд өчигдөр өглөөний Улаанбаатар-Москва чиглэлийн онгоцоор нисэх тийз захиалан нутаг буцах гэж байжээ.

Албаны эх сурвалжийн мэдээлснээр “Украйн улсын иргэн 34 настай Сергей, 24 настай Юрий нар нь энэ сарын 18-23-ныг хүртэлх дөрөв хоногийн хугацаанд Хаан банкны АТМ-аас ойролцоогоор 100 сая төгрөг авсан нь тогтоогдсон байна. Тэд хулгайлсан 100 сая төгрөгийг  40 мянган еврогоор солиулж, хуруу зайны хэмжээтэй болтол нь имэрч бөөрөнхийлөөд гадуур нь гялгар уутаар бүрсэн байжээ. Гэмт этгээдүүд Баянзүрх, Сүхбаатар, Баянгол, Чингэлтэй дүүргийн нутаг дэвсгэрт байрлах томоохон банкны АТМ-аас мөнгө залилсан байна. Гадаадын иргэн гэмт хэрэгт холбогдсон тохиодолд УМБГ-ын хүнд гэмт хэрэгтэй тэмцэх хэлтэст шалгадаг. Тиймээс тэдний хэргийг УМБГ шалгаж эхэлсэн байна.