Поп хатагтай Б.Сарантуяа тавдугаар сарын 11-22-ны хооронд Шведийн Стокгольм, Английн Лондон, Бельги улсын Антверпен хотод "Unforgettable evening" буюу “Сэтгэл догдлуулсан орой” аялан тоглолтоо толилуулаад ирлээ. Поп хатагтайн энэ удаагийн аялан тоглолтын сониноос дуулгахад, тэрбээр Европын орнуудад хийсэн тоглолтоо үзэгч, фенүүддээ зориулан тухайн улсад суугаа Монгол Улсын Элчин сайдын яамтай холбогдон зохион байгуулсан байна. Түүний тоглолтын тасалбар хэдийнэ тоглолтын өдрөөс өмнө онлайнаар борлогдсон байжээ. Манай хамтлаг, дуучид гадаадад тоглолт хийхээрээ ихэвчлэн Монголчуудыг цугладаг шөнийн цэнгээний газар, пабыг сонгодог. Харин зууны манлай дуучин Сараа энэ удаад дээрх уламжлалаас татгалзан үзэгчдээ тохилог орчинд урлагийн сайхныг мэдрүүлэхээр Лондонд хийсэн тоглолтоо “Rudolf Steiner Theatre” буюу эртний засал бүхий цомхон театрт болон Шведийн Стокгольм хотын театрыг сонгон, тоглолтоо хийжээ.

“Сэтгэл догдлуулсан орой” тоглолтод хуучны хит дуунууд бараг л бүгдээрээ эгшиглэжээ. “Хайрын бурхан”, “Хархорин”, “Би жаргалтай”, “Санаж байна уу” гээд л ар араасаа дурсамж дагуулсан хитүүд.

Магадгүй, та гадаадад суугаа монголчууд азтай юм аа гэж бодож байгаа бол таньд ч гэсэн энэхүү хит дуунуудыг амьдаар сонсон, түүнтэй зургаа татуулан, хүссэн асуултдаа хариулт авах алтан боломж энэ сарын 27-нд ганцхан удаа тохиолдож байгааг дуулгая. Поп хатагтай энэ сарын 27-нд “iLoft function house”-д өөрийн фейсбүүкийн найзууд болон фенүүддээ зориулан “Сэтгэл догдлуулсан орой” тоглолт хийхээр болжээ. Тэрбээр жил бүр төрсөн өдрөөрөө фенүүдтэйгээ уулзан тоглолтоо хийдэг байсан бол энэ жил Казахстанд аялан тоглолтоор явж байсан учраас гадаадад тэмдэглэн өнгөрүүлсэн. Харин фенүүд, найзууд нь түүний тоглолтыг үгүйлэн энэхүү тоглолтоо хийх хүртэл нь ятгаж чаджээ. Энэ үдэш түүний хамт “Шар айраг” хамтлагийн гитарчин, дуучин Буянаа буюу Ж.Буянтогтох болон гарынх нь шавь болох Улсын филармонийн дуучин Л.Насанбуян нар ая дуугаа өргөх нь ээ. Тоглолтын тасалбар 25 мянган төгрөг бөгөөд “iLoft function house”-д поп дива 500 зочин хүлээж авах тул та тасалбараа амжиж аваарай.