Авлига, хээл хахуулийн хэргээр эрүү үүсгэн шалгагдаж байсан экс Ерөнхийлөгч Н.Энхбаяр мэдээж хэрэг шүүх хуралд ирсэнгүй. Мэдээж гэхийн учир нь хөл нүцгэн өргүүлээд сурчихсанд байгаа юм. Үүний хажуугаар УИХ-ын сонгуульд нэрээ дэвшүүлэх боломж гаргахын тулд цаг хожиж байгаа хэрэг. Н.Энхбаяр нь өлсгөлөнгөө зогсоосноос хойш зүгээр хэвтсэнгүй. Хувийнхаа эмч нараар “Олон нийтийн дунд гарч болохгүй гэсэн” шал балай дүгнэлт гаргуулжээ. Экс Ерөнхийлөгч анхнаасаа л хувийнхаа эмч нарт итгэж, бусад цагаан нөмрөгтнүүдийг биедээ хүргэхээс ч сэжиглэн цээрлэсэн. Бараг л өөрийг нь “юу яачихна” гэж харддаг бололтой.

Олон нийтийн дунд гарч болохгүй гэсэн шинэ оношоор бол айхтар харгис хэрцгий, сэтгэцийн өвчтэй, гаж донтон байж болзошгүй. Аль эсвэл олон хүн харахаар цөс нь хөөрч элдэв балай үйлдэл хийдэг алиа салбадай ч байж болзошгүй.

За бараг сүүлчийнх нь онош л зөв болох байх даа. Мань эр гадна сэтгүүлчид болон хөгжөөн дэмжигчид байгаа гэхээр гутлаа тайлж шидээд дээшээ хараад хэвтчихдэг юм гэсэн. Харин хүнгүй байна гэхээр хүн төрхөндөө ордог гэнэ лээ. Гэхдээ шүүх гаж донтонг ч, сэтгэцийн өвчтөнг ч, алуурчинг ч, хулгайчийг ч, тэр ч бүү хэл ийм авлигачдыг ч шүүх л ёстой.

Харамсалтай нь Н.Энхбаяр шүүх хурлыг хийлгэхгүй байх талаар төрийн гурван өндөрлөгийг эзэгнэж байснаасаа илүүтэйгээр өлсгөлөн тархиа гашилгаж байгаа биз ээ. Хэрэвзээ тэр шүүх хуралдаа ирэхгүй бол энэ байгууллага татан буугдахаас өөр замгүй. Мөн Үндсэн хуульд Н.Энхбаярын дархан эрхийн тухай тусгайлан зааж, Эрүүгийн хуульд нэмэлт өөрчлөлт оруулахаас өөр аргагүй.