Өнгөрч буй улиралд Аваргуудын лигийн анхны цомоо гардсан Английн “Челси” клуб энэ зуны солилцоогоор чамгүй хөрөнгө оруулалт хийхээр төлөвлөөд буй гэдгээ мэдэгдсэн. Сүүлийн үеийн мэдээллээр тэд “ЦСКА Москва” багийн довлогч Сейду Думбьяг онилжээ. Кот д’Ивуарын 24 настай тоглогчийг Оросын баг 24 сая фунт стерлингээр үнэлсэн байна.

“Челси”-гийн тухайд нэлээд хэмжээний хөрөнгө зарахаар шийдсэн ч “Манчестер Сити” гэх өрсөлдөгчөөсөө эмээж буй гэнэ.

Думбья нь Дидье Дрогба, Саломон Калу нарын хамт шигшээ багтаа хүчин зүтгэдэг. Калу, Дрогба нарын тухайд энэ зуны “Стэмфорд Бриж”-ийг орхих нь тодорхой болоод байгаа билээ.

“Челси” клубтэй холбоотой нэмэлт мэдээлэл хүргэхэд, тэд хагас хамгаалагч Фрэнк Лампардад урт хугацааны гэрээ санал болгосон байна. Түүнчлэн Майкл Эссьен, Флоран Малуда нар ч гэрээгээ сунгахаар ярилцаж буй гэнэ.