Нью-Йоркт төвтэй хамгийн богино хэмжээний киноны олон улсын наадам /”Very short international film festival”/-ын өнгөрсөн дөрөвдүгээр сард болсон шалгаруулалтад Сингапурын найруулагч Алисса Сингийн “Тогоруу ахайтан” бүтээл загварын кино төрөлд түрүүлжээ. Хамгийн сонирхолтой нь, тус кинонд Сингапурын “Дива” агентлагт загвар өмсдөг монгол бүсгүй болох Л.Гэгээ тоглосон байна. Загвар өмсөгч Л.Гэгээ Сингапурын нэрт загвар зохион бүтээгч Макс Таны хувцсыг өмсөн толилуулсан байна. Хамгийн богино хэмжээний киноны олон улсын наадамд гурваас дээшгүй минут бүхий бүтээл оролцдогоороо онцлогтой юм.

Монголын нэрийг Азийн чихэнд дуурсгаж байгаа цөөхөн загвар өмсөгчдийн нэг нь Л.Гэгээ юм. Тэрбээр мөн саяхан Singtel буюу Сингапурын хамгийн том үүрэн утасны корпорацийн сурталчилгаанд тоглосон байна. Л.Гэгээ өмнө нь АНУ, Англи, Японы загварын агентлагуудад гэрээгээр ажиллаж байсан арван жилийн туршлагатай загвар өмсөгч бөгөөд “Гоёл” наадмын сүүлийн хоёр жилийн гадаад харилцааны хэсгийг хариуцан, япон болон сингапур загвар зохион бүтээгчдийг урьж оролцуулах, тус наадмыг олон улсын жишигт хүргэх ажлыг гардан зохион байгуулж байжээ.