“Титэм” хамтлагийг 1989 онд үүсгэн байгуулж, 1990-ээд оны залуусыг хайрын дуугаар уярааж, хайрын дууны ханхүү хэмээн нэрлэгдэж байсан ая зохиогч, дуучин, продюсер Л.Тайванбатыг цэнхэр дэлгэцээр харалгүй уджээ.  Харин өчигдөр орой  “Камертон 2” шоунд зочин шүүгчээр уригдаж, оролцогчдыг сайшаан магтаж, зарим нь нэгийг нь шүүмжилж, бас дуунд нь уярч хайлан сууж байхыг нь харахад сайхан санагдаж байлаа. “…Зүрхэнд минь үгүйлэгдсэн чи миний үзэсгэлэнт од…” хэмээн дуулж олны танил болж байсан тэрбээр “Камертон” хамтлагийн продюсераар ажиллаж, мөн “Freezone” хамтлагийг олонд таниулж, Монголчуудад хөвгүүдийн хамтлаг гэж ямар байдгийг жинхэнэ утгаар нь мэдрүүлж чадсан авьяас билэгтэн. Монголын рок, поп урлагт түүний оруулсан хувь нэмэр их.

“Камертон 2” шоуны оролцогчдын хувьд цаг үеийн шалгуурыг ажрахгүй даван туулж, олноос олон он жилүүдийн уртад ард түмний амандаа аялан дуулах дуртай хит дуунуудыг төгөлдөр хуурын хамт дуулан өрсөлдөж байгаа. Тухайн уран бүтээлүүдийг нь өлгийдөн авсан эрхэм хүндтэй уран бүтээлчдийн өмнө шалгуулж, үнэтэй зөвөлгөөг нь сонсож байгаа  болохоор энэ бол тэдний хувьд маш том аз завшаан хэмээн оролцогчид ярьж байсан шүү.