Дэлхийн чансааны хоёрдугаарт эрэмбэлэгдэж буй ОХУ-ын теннисчин Мария Шарапова Италийн нийслэл Ромд "BNL d"Italia" буюу Ромын нээлттэй тэмцээний шигшээ тоглолтод Хятадын Ли На (8)-г 4:6, 6:4, 7:5-н харьцаагаар буулган авсан байна. Шарапова тэмцээний дараа хэлэхдээ “Хэн нэгэн ялах байсан, харин тэр тийм амар өрсөлдөгч биш юм. Шороон талбайд болж буй тоглолтууд их сайхан өнгөрлөө. Роллан Гаррост оролцоход сэтгэл дүүрэн байна” гэсэн байна.

Шарапова оны анхны “Их дуулга” болох Австралийн нээлттэй тэмцээний шигшээд Беларусийн Виктория Азаренкад /6:3, 6:0/ ялагдаж байсан. Тэрбээр өнгөрсөн сард Германы Штутгартын тэмцээнд түрүүлсэн бөгөөд ийнхүү оны хоёр дахь цомоо хүртлээ.

Хятадын тэргүүн теннисчин, дэлхийн чансааны наймд эрэмбэлэгдэж буй Ли Нагийн хувьд тус тэмцээний шигшээд анх удаа шалгарч байгаа бөгөөд ирэх долоо хоногт эхлэх "Ролланд Гаррос"-ын өмнө бэлтгэл сайтай байгаа харууллаа. Өнгөрсөн жил тэрбээр “Ролланд Гаррос”-т түрүүлсэн анхны Ази теннисчин болсон билээ.

Харин эмэгтэй хосын төрөлд Италийн Сара Эррина, Роберто Винчи нар ОХУ-ын хос Екатерина Макаров, Елена Веснинаг 6:2, 7:5-ийн харьцаагаар буулган авсан байна.

Эрэгтэйчүүдийн аваргын төлөө дэлхийн тэргүүн теннисчин Сербийн Новак Жоковчи болон тус тэмцээний таван удаагийн аварга Испаний Рафаэль Надаль шалгараад байсан бөгөөд цаг агаарын улмаас тэдний тоглолт хойшлон өнөөдөр болох юм байна.

Нийт хоёр сая ам.долларын шагналын сантай тус тэмцээний аваргууд 460 мянган ам.долларын шагнал хүртэж, чансааны 1000 оноо хүртэх бол хосын төрлийн аваргууд 140 мянган ам.доллар хүртэж, чансааны 1000 оноо хүртэх ажээ.

Дашрамд дуулгахад талбайн теннисний оны хоёр дахь “Их дуулга” болох “Ролланд Гаррос” буюу Францын нээлттэй тэмцээн энэ сарын 28-нд эхлэх юм байна.