Аваргуудын лигийн цомыг анх удаа хүртсэн “Челси” багийнхан баруун Лондонд орших Стэмфорд Брижийн ойролцоох гудамжинд үнэнч фанатуудтайгаа хамт баярын парадаа хийлээ. “Альянц Арена”-д болсон шигшээ тоглолтоос ойролцоогоор 24 цагийн дараа Баруун Лондонгийн баг энэхүү парадыг хийсэн бөгөөд 10 мянга гаруй фанат цугларсан байна.  “Лондонгийн язгууртнууд” Роберто ди Маттеогийн удирдлага дор энэ жил FA Cup болон түүхэндээ анх удаа Европын аварга болж чадсан юм. Харин “Байерн Мюнхен”-ийг өөрсдийн цэнгэлдэхэд нь торгуулийн цохилтоор хожсон тоглолтод Челсигийн 25,000 мянга гаруй фенүүд Германы цэнгэлдэхэд  шигшээ тоглолтыг үзэн хайртай багаа дэмжиж байсан бол Лондон хотноо зурагтаар үүнээс ч илүү олон мянган хүмүүс сэтгэл догдлон үзэж байжээ, Мөн Их Британийн Ерөнхий сайд Дэвид Камерун, Германы канцлер Ангела Меркел болон “Их найм”-ын бусад тэргүүнүүд АНУ-ын Кэмп Дэвидэд аваргуудын лигийн шигшээ тоглолтыг үзсэн байна.

2003 онд Оросын тэрбүмтан Роман Абрамович нийт 140 сая фунт стерлингээр Английн багийг худалдан авч тэр жилдээ 100 саяыг шинэ тоглогчдод зарцуулж байсан. Үүнээс хойш “Лондонгийн язгууртнууд” Аваргуудын лигт нэг, Премьер лигт гурав, FA Cup-т дөрөв, Лигийн цомд хоёр, Фэй Комунитти шилд буюу холбоодын цомд хоёр удаа тус тус түрүүлээд байна.