Нийслэлийн Чингэлтэй дүүргийн Ардчилсан намын хуралдаан өчигдөр болж, НИТХ-ын төлөөлөгчдөд нэр дэвших хүмүүсийнхээ нэрсийг тодруулсны зэрэгцээ УИХ-ын сонгуульд нэр дэвшигчдийг ч урьдчилсан байдлаар гаргажээ. Энэ удаагийн хуралдаанд нийт 80 гаруй гишүүн оролцож, нэр дэвшигчдийг нууц санал хураалтаар тодруулсан байна. Тухайлбал, нийслэлийн Чингэлтэй дүүргийн Арчилсан намаас дүүргийн ИТХ-ын төлөөлөгчдөд нийт 11 хүнийг нэр дэвшүүлснээс н.Энхболд, н.Баянмөнх, н.Наранбаатар, н.Бат-Эрдэнэ нар олонхийн санал авч, орон нутгийн сонгуульд өрсөлдөх болзол хангасан байна. Дараа нь УИХ-ын сонгуульд өрсөлдөх нэр дэвшигчдээ тодруулах ажилд оржээ.

Нийслэлийн Чингэлтэй дүүргийн хувьд хоёр мандаттай болж, өмнөхөөсөө мандатын тоо нэгээр буурсан аж. Ардчилсан намын удирдлагуудын зүгээс Чингэлтэй дүүргийн Ардчилсан намын даргад хандан “УИХ-д өрсөлдөх нэр дэвшигчдийнхээ нэрийг ирэх мягмар гариг гэхэд эцэслэж саналаа ирүүлээрэй” гэдэг чиглэлийг өгсөн байсан гэнэ. Энэ тухайгаа ч дээрх хуралдааны үеэр танилцуулж ямар ч байсан эхний удаад хэн, хэн санал авах нь вэ гэдгийг урьдчилж тандъя гэдгээ хэлж энэхүү санал хураалтыг нууцаар явуулжээ. Санал хураалтын дүнг нэгтгэхэд нийслэлийн Чингэлтэй дүүргийн Ардчилсан намын дарга Б.Батбаатар нэгээр, хоёрт Чингэлтэй дүүргийн МоАХ-ны дарга Д.Алтанхуяг, гуравт УИХ-ын гишүүн Батж.Батбаяр, дөрөвт УИХ-ын гишүүн Г.Баярсайхан гарч ирсэн байна.