Нийслэлийн Чингэлтэй дүүргийн 8, 9, 10, 11 дүгээр хороо буюу Дэнжийн мянга орчмын айл өрхүүдийг төвлөрсөн халаалтын шугамд холбох ажил өнгөрсөн бямба гаригаас эхэллээ.

Нийслэлийн агаарын бохирдлыг бууруулах ажлын хүрээнд Цэвэр агаар сангаас 9 тэрбум төгрөг зарцуулж гүйцэтгэх энэ ажлын хүрээнд эхний ээлжинд 43 ширхэг цагаан байр, 39 дүгээр сургууль, өргөтгөлийн хамт, 124 дүгээр цэцэрлэг, шинээр баригдах спорт цогцолбор, жилдээ 1900 гаруй тонн нүүрс шатааж агаарыг бохирдуулдаг дунд хүчин чадлын 10 гаруй нам даралтын зуух, айл өрхийн 200 гаруй халаалтын зуух төвлөрсөн халаалтад холбогдоно.

Нилээд хүндрэлтэй боловч зориг гаргаж эхлүүлж буй энэ ажил нь жинхэнэ утгаараа гэр хорооллыг барилгажуулах ажлын бодит эхлэл гэдгийг хотын дарга энд хэлсэн үгэндээ онцолсон. Иргэдийн ая тухтай амьдрах нөхцөл бүрдэх, газар нь эдийн засгийн эргэлтэнд орох, гэр хорооллыг орон сууцжуулах болон хотын хөгжлийн ерөнхий төлөвлөгөөг хэрэгжүүлэх боломжтой болно. 9 дүгээр сарын 15 гэхэд ашиглалтад орж, Дэнжийн 1000-ынхан төвлөрсөн халаалттай болсноор 60 гаруй жил түүхий нүүрс шатааж байсан явдал арилж, нийслэлийн агаарын бохирдлыг бууруулахад томоохон нөлөө үзүүлэх юм.