Монголын хөгжмийн урлагийн салбарт шинэ соргог, шилдэг хамтлаг бий болгох зорилгоор нэгдсэн “Камертон” хамтлаг, “В Production”, “Боловсрол” суваг телевиз, “Music box” сувгийн хамтын бүтээл “Камертон-2” шоу цэнхэр дэлгэцээр үдэш бүр үзэгчидтэй уулзаж байгаа билээ. Эхний шатны шалгаруулалтыг “Камертон” хамтлагийн дөрвөл дэнсэлсэн бол хоёрдугаар шатанд “Инээмсэглэл” хамтлагийн дуучин Н.Ганхуяг, “Хөх тэнгэр” хамтлагийн дуучин, Гавьяат жүжигчин Б.Дашдондог, “Титэм” хамтлагийн дуучин Л.Тайванбат, “On`n off” продакшны захирал, продюсер С.Ононбат, “Никитон” хамтлагийн ахлагч, дуучин Б.Батчулуун нарын эрхмүүд зочин шүүгчээр оролцох юм. Тэдний хувьд нэн түрүүнд шүүгчийн үүргээ гүйцэтгэхээс гадна оролцогчдоо мэргэжлийн үүднээс зөвлөгөө өгөх гэнэ.

“Камертон-2” шоуны хоёрдугаар шатанд шалгарсан оролцогчид 1960-1990 оны хит дуунуудаас сонголтоо хийж, төгөлдөр хууртай дуулна. Төгөлдөр хуурыг “Араг билиг” хамтлагийн продюсер, төгөлдөр хуурч Т.Пүрэвсүх тоглох аж.