“Айвенхоу Майнз” компани нэрээ өөрчилж, Өмнөговь аймагт хэрэгжүүлж буй зэс, алтны асар том орд Оюутолгойн нэрээр “Turquoise Hill Resources” болгохоор хувьцаа эзэмшигчдийн дунд санал асуулга явуулах гэнэ. “Айвенхоу Майнз” нэрээ өөрчлөх болсон шалтгаан нь Монголын эдийн засгийн өсөлтийг дэмжиж, асар их ашиг авчрах Оюутолгой төсөлтэй шууд холбоотой боловч нөгөө талаар хяналтын хувьцааг нь эзэмшигч “Рио Тинто”группийн давамгайллын эсрэг авч буй алхам бололтой.

Оюутолгойн ордод эхнээс нь хамтран хөрөнгө оруулсан “Рио Тинто” групп “Айвенхоу Майнз”-ын хувьцааг худалдаж авснаар хяналтын 51 хувийг эзэмших болсон. “Рио Тинто” “Айвенхоу Майнз”-ын хяналтын хувьцааг худалдан авснаар “Оюутолгой” төслийн гүйцэтгэгчийн үүрэг, менежментийг хяналтандаа авч гүйцэтгэх захирал Роберт Фрийдландын оронд Кей Пристли, санхүүгийн захирлаар Крис Бейтмэн нарыг томилсон юм. “Айвенхоу Майнз” нэрээ өөрчлөхөөр болсон нь “Оюутолгой” төслийг “Рио”-д алдахаас сэргийлж буйг харуулж байгаа юм.