Монголын бодибилдинг фитнессийн холбооны энэ жилийн УАШТ маргааш “UB Palace”-ийн “Royal” танхимд зохион байгуулагдах гэж байна. 21 дэх удаагийн “Монголын мистер”-ийг тодруулах тэмцээн эрэгтэйчүүдийн 60, 65, 70, 75 кг, үнэмлэхүй, эмэгтэйчүүд фитнесс болон үнэмлэхүй төрөлд болох юм. Энэ жилийн УАШТ-д түрүүлсэн тамирчин есдүгээр сард Узбекистаны нийслэлд Ташкентэд болох Азийн АШТ-д эх орноо төлөөлөн оролцох бөгөөд “Монголын мистер” дөрвөн сая төгрөг хүртэнэ. Сонирхуулахад МБФХ-ны урилгаар дэлхийн болон Азийн хошой аварга, БНСУ-ын Ли Жин Хо, Олон улсын бодибилдингийн холбоо (IFBB)-ны шүүгч, БНСУ-ын шигшээ багийн дасгалжуулагч Ким Дон Хун, Азийн бодибилдингийн холбооны дэд ерөнхийлөгч Хонг Ён Ро нар манай оронд хүрэлцэн ирээд байгаа аж.