“Asian shop” хамтлагийнхан өнгөрсөн сард анхны цомгоо өлгийдөж, нээлтийн баяраа хийсэн билээ. Тэдний шинэ цомог нь “ASIAN SHOP THE JAZZ ALBUM” хэмээх нэртэй бөгөөд дэлхийн шилдэг жазз арван дуунаас бүрдсэн байна. “Asian Shop” хамтлаг нь Монголдоо төдийгүй Ази тивд жазз урсгалаар уран бүтээлээ туурвидаг анхны эрэгтэй хамтлагаар тодроод байгаа бөгөөд үүний баталгаа болгож, 2010 онд Бээжин хотноо зохиогдсон Азийн 10 гаруй орны мэргэжлийн залуу уран бүтээлчид оролцсон “Ази тивийн шилдэг залуу уран бүтээлчдийг шалгаруулах наадам”-аас Монгол Улсаа тэр дундаа залуу уран бүтээлчдээ төлөөлөн оролцож, дууны төрөлд шилдэг эрэгтэй хамтлагаар шалгарч Гран-При шагналыг нь эх орондоо авчирч байсан юм. Харин тэд ойрын үед тун завгүй байгаа бөгөөд дахин шинэ цомгоо фэнүүддээ өргөн барихаар зэхэж байгаа гэнэ. Шинэ цомог нь “Монгол жазз” хэмээх нэртэй бөгөөд 12 дуунаас бүтэж байгаа юм байна.