Улаанбаатарын “Дулааны тавдугаар цахил­гаан станц”-ыг барих тен­дерийн эцсийн шатанд хоёр консерциум тунаж үлдээд байгаа ажээ. Төрийн өмчийн хорооны мэргэжилтнүүдийн ярьж байгаагаар тавдугаар цахилгаан станцыг барих тендерийн ялагчийг энэ сард багтаан тодруулах бололтой. Гэхдээ Засгийн газар, Үндэсний аюулгүй байдлын зөвлөлөөр хэлэлцүүлсний эцэст тендерийн ялагчийг тодруулах гэнэ. Тендерийн эхний шалгаруулалтад 11 консорциум материалаа ирүүлсэн байна. Тендерийн эхний шалгуурыг давсан 11 компанийг сонирхуулья. БНСУ-ын Эрчим хүчний корпо­рацийн охин компани болох “Kowero” буюу “Korea western power” компани дангаараа өрсөлдсөн  бол БНХАУ-аас оролцогч “Sheng Hua Sheng Dong Power” болон NCPE компани нэгдэж оролцсон. Монголын “Ньюком” групп Японы “Сожиц” корпораци, Англид төвтэй” “International power PLC” компанитай хамтран оролцсон бол Мөн  “Бишрэлт холдинг”  болон “Монпэтэкс” ком­па­нийн нэгдэл тендерт оролцохоор саналаа өгсөн байдаг. Электрон бараагаар дэлхийд тэргүүлэгч “Samsung”-ийн “Samsung C and T” компани Өмнөд  Солонгосын цахилгаан эрчим хүчний “Kospo” компанитай хамтран тендерт оролцсон бол Энэтхэг, БНСУ-ын хамтарсан “Daelim-Lanco” нэгдэл манай улсаас зарласан тендерт оржээ. ХБНГУ-ын дэлхийд алдартай “Siemens”-ийнхэн БНСУ-ын ” Hyundai E and C”, “LG international” хамтран саналаа өгсөн бол “МАК” компани “EWP consortium” нэртэйгээр өрсөлдсөн. ОХУ-аас “JSC Technopromexport” компани “EurosibEnergo” консерциум нэрийн дор тус JSC гэх 18 цахилгаан станцтай компанитай хамтарч байгаа аж. Эдгээрийн дөрвийг хоёр дахь шалгаруулалтад үлдээн нэмэлт материал авахад хоёр нь шаардлага биелүүлжээ. Тэдний нэрийг Төрийн өмчийн хороо одоохондоо нууцалж байгаа гэнэ. Төрийн өмчийн хорооноос тендерт оролцогчдыг  шалгаруулахдаа хоёр гол үзүүлэлтийг чухалчилж үзэж байгаа гэнэ. Нэгдүгээрт,тавдугаар цахилгаан станц нь  орчин үеийн техник, технологид суурилсан байх ёстой. Хоёрдугаарт, ус бага ашиглах, агаарын бохирдол бага гаргах зэрэг шалгуурыг тавьж байгаа аж.

Монгол Улсын эрчим хүчний хэрэглээ жилээс жилд өсөн нэмэгд­сээр буй. Тухайлбал, Улаанбаатар хотын цахилгааны хэрэгцээ 2015 онд 531 мВт, 2030 онд 2361 мВт болж нэмэгдэнэ гэсэн тооцоог Эрчим хүчний газраас гаргасан байгаа. Өсөн нэмэгдэж байгаа эрчим хүчний хэрэглээг хангахад одоо ажиллаж байгаа цахилгаан станцуудын чадал цаашдаа хүрэлцэхгүй гэдгийг салбарын мэргэжилтнүүд нь ярьдаг. Монгол Улсын эрчим хүчний салбарт  шинээр эрчим хүчний эх үүсвэр барих шаардлага зайлшгүй тулгараад байгаа  бөгөөд Засгийн газраас Дулааны тавдугаар цахилгаан станц барихаар бэлтгэл ажлыг эхлүүлээд байгаа юм. Тавдугаар цахилгаан станцыг анх Улиастай аманд барихаар төлөвлөж байсан боловч  газар нутгийн байршлаас шалтгаалж, цахилгаан станц барихад тохиромжгүй хэмээн үзсэн. Тиймээс Дулааны гуравдугаар цахилгаан станцыг дэргэд барихаар шийдвэрлэсэн бий. Улаанбаатар хот болон төвийн бүсийг найдвартай эрчим хүчээр хангах зорилгоор V ДЦС-ийг барихаар ТӨХ-оос олон улсын тендер зарласан. Уг тендерт цөөнгүй компани өрсөлдөнөөс Тавдугаар цахилгаан станц төслийн зөвлөх компаниар сон­гогд­сон АНУ-ын “H&J”-гийн тоо­цо­о­гоор уг цахилгаан станцыг барихад ойролцоогоор 1.8 тэрбум ам.доллар зарцуулагдах юм байна. Энэ мөнгөний тодорхой хэсгийг Хөгжлийн банкнаас гаргахаар болсон. Өөрөөр хэлбэл, Хөгжлийн банк олон улсын хөрөнгийн зах зээлээс босгосон 600 сая ам.доллароосоо тавдугаар цахилгаан станц барих ажлыг санхүүжүүлэх юм байна. Жилд 820 мВт цахилгаан үйлдвэрлэх хүчин чадалтай байхаар тооцож буй тавдугаар цахилгаан станц жилдээ 2.5 сая тонн нүүрс хэрэглэж, одоогийнхоос даруй хоёр дахин илүү цахилгаан, дулаан үйлдвэрлэх тооцоотойг гаргажээ. Мөн нүүрснээс ялгаруулах утааг 100 хувь цэвэршүүлж, үнсний 99 хувийг шүүн барилгын материалд ашиглах боломжтой байхаар тооцоолжээ.  Улаанбаатарт барих тав­дугаар цахилгаан станц нь 450 мВт цахилгаан, 500 Гкал дулаан үйлдвэрлэнэ. Тавдугаар цахилгаан станц ашиглалтад орсноор Улаан­баатарын дулаан, төвийн бүсийн эрчим хүчний дутагдал арилах юм. Эрчим хүчний газар тавдугаар цахилгаан станцыг 2015 онд ашиг­лал­тад оруулахаар төлөвлөсөн байна.