Дархан хотын барилга байгууламж зөвлөлтийн барилгачдын  ур ухаан, гараар бүтэж, манай ард түмэн орос ах нар хэмээн хүндэтгэлтэй ханддаг. Давхрын өртөө буюу одоогоор Дархан сумын 5 дугаар багийн нутаг дэвсгэрт ЗХУ-ын мэргэжилтнүүд болон дайчдын  оршуулгын газар бий. Уг газрыг  одоогоос 60 гаруй жилийн өмнө олгосон байдаг. Өнөөдрийн байдлаар 71 орос хүн тус газарт нойрсож байгаа юм. Эдгээрээс 17 нь эх орны 2-р дайнд оролцож явсан ахмад дайчид. ОХУ-ын ерөнхий консулын газраас аймаг орон нутгийн удирдлагуудад удаа дараа  тус газрыг хамгаалалтад авахаар хүсэлт гаргажээ. Ийнхүү өнөөдөр  Дархан хотын бүтээн байгуулалтад гар бие оролцож СОТ-1-д ажиллаж байсан барилгачид болоод  ахмад дайчдын  71 хүний нэрийг сийлсэн хөшөөг босгож,  дурсгалыг нь мөнхжүүллээ.

Дархан хотод нойрсож байгаа оросын мэргэжилтнүүдийн ар гэрийхэн 2 жилд 1 удаа уулзаж бурхан болоочын газрыг цэвэрлэж ариусгадаг аж. Дурсгалын хөшөөг нээх ёслолд Эрхүү, Буриад, Улан-Үдээс хамаатан садан нь ирж хөшөөнд хүндэтгэл үзүүлж амьд цэцгийн баглаагаар хөшөөг бүрхсэн юм.

Манай хотод хүн ам өсөхийн хэрээр гэр хороолол хүрээгээ тэлж байгаа. Давхрын өртөө буюу оросуудын нойрсож байгаа тэр газарт иргэд амьдрах нь холгүй байгаа учраас ОХУ-ын ерөнхий консулын газраас уг газрыг хамгаалалтад авахаар болжээ. Эхний ээлжинд хөшөө босгож дурсгалыг нь мөнхжүүлэх бол цаашлаад хамгаалалтын хашаа татаж , зүлэг ногоо тарьж ургуулан бичил ногоон байгууламж болгоно гэдгийг ОХУ-аас Дархан хотод суугаа ерөнхий консул Мостыка хөшөөний нээлтийн үеэр онцлон хэллээ.