Дээрхийн гэгээнтэн XIV Далай ламд хор өгч хороохоор эмэгтэй тагнуулуудыг илгээсэн гэдэг мэдээллийг Хятадын тал эрс няцаажээ. Хятадын Гадаад харилцааны яам дээрх мэдээлэл цацагдсан даруйд үүнийг “үндэслэлгүй зүйл” гэж мэдэгдсэн байна. Дээрхийн гэгээнтэн Далай лам саяхан нэгэн сонинд өөрийнх амь насанд халдахаар завдаж буй тухай батлагдаагүй мэдээлэл сонссон хэмээн ярьсны дараа Хятадын Гадаад харилцааны яам эсрэг мэдэгдэл гаргасан аж.

Хэл соёлоор Хятадаас тэс ондоо Түвдийн салан тусгаарлах бодлогод тус улсын эрх баригчид Дээрхийн гэгээнтнийг буруутгасаар ирсэн юм. XIV Далай ламын амь насанд халдахаар төлөвлөж буй тухай мэдээлэл гарсны дараа Хятадын Гадаад харилцааны яамны төлөөлөгч Хонг Лей гэгч Дээрхийн гэгээнтнийг олон нийтийн анхаарлыг татахын тулд ийм яриаг санаанаасаа зохиосон хэмээн буруутгажээ. Тэрбээр мөн Далай ламыг хуврага хүний жанч нөмөрч, олон улсад Хятадын эсрэг үзлийг түгээдэг хэмээн шүүмжилжээ.

Түвдийг өөрийн салшгүй нэг хэсэг гэж үздэг Хятад улс 1950 онд Түвд рүү цэргийн хүчээр эзлэн авсан аж. 1959 онд Түвдэд Хятадын эрх баригчдын бодлогыг эсэргүүцсэн хөдөлгөөнийг цус асгаруулан хүчээр дарсны дараа Дээрхийн гэгээнтэн Энэтхэг рүү дүрвэн гарсан билээ.