Монголын урлагийн зөвлөлөөс санаачлан АНУ-ын ЭСЯ болон Нээлттэй нийгэм форумын дэмжлэгтэйгээр “Соёл урлаг ба сэтгүүлзүй” сургалт зохион байгуулах ажээ. Сургалт тавдугаар сарын 18, 19-нд буюу баасан, бямба гаригт Монголын түүхийн музейд болох юм. АНУ-ын “Arts Journal” онлайн сэтгүүлийн эрхлэгч, ноён Дуглас МакЛенаны удирдан явуулах сонирхолтой сургалтад,

• “Монгол дахь соёл урлагийн сэтгүүлзүйн өнөөгийн байдал, тулгамдаж буй бэрхшээл, боломж”

• Соёл урлагийн сэтгүүлзүй – Түүх ба хамрах хүрээ: Өрнөдийн соёл урлагийн сэтгүүлзүйн зорилго, онол, туршлага

• Соёл урлагийн сэтгүүлзүй: Агуулга ба түүнийг хэрхэн бичих

• Соёл урлагийн сэтгүүлзүйгээр дамжуулан нийгмийн үнэт зүйл ба хөгжилд оруулах хувь нэмэр

• Цахим мэдээллийн хувьсгал: Соёл урлагийн талаарх мэдээллийг хүргэх шинэлэг арга барил

• Цахим технологи ба соёл урлаг. Цахим мэдээллийн сүлжээний үүрэг зэрэг тун сонирхолтой сэдвүүд багтсан байна.

Ярилцлага, харилцан яриа хэлбэрээр өрнөх сургалтын “Соёл урлаг ба сэтгүүлзүй” үдийн ярилцлагад Ардын жүжигчин Н.Жанцанноров, Төрийн шагналт зохиолч Д.Батбаяр, Урлаг судлаач О.Сосор нарын уран бүтээлчид уригджээ. Сургалтын удирдагч Дуглас МакЛенаны талаар товч мэдээлэл хүргэе. АНУ-ын “Arts Journal” цахим сэтгүүлийн эрхлэгч энэ эрхэм 1999 онд соёл урлагийн мэдээллийг хүргэдэг 60 орчим блогчдыг нэгтгэн, “Arts Journal”-ыг үүсгэн байгуулжээ. Сэтгүүлч, шүүмжлэгч, илтгэгч Дуглас МакЛенаныг соёл урлаг болон технологийн чиглэлээр олон арван өгүүллэг бичиж байсан шилдэг уран бүтээлч юм.