Засгийн газрын бараа, үйлчилгээ худалдан авах тендерийг өнөөдөр анх удаа цахим хэлбэрээр зарлалаа. Анхны цахим тендер шалгаруулах ёслолд Сангийн сайд, БНСУ-аас Монгол Улсад суугаа Онц бөгөөд Бүрэн эрхт Элчин сайд, Солонгосын олон улсын хамтын ажиллагааны байгууллагын Монгол дахь суурин төлөөлөгч, Гаалийн ерөнхий газар, Татварын ерөнхий газар, Худалдаа хөгжлийн банк, Голомт банк, ХААН банкны төлөөлөл оролцсон юм. Анхны цахим тендерийн урилгыг Сангийн сайд Д.Хаянхярваа орууллаа. Тендерийн урилга Сангийн яам, Татварын ерөнхий газар, Гаалийн ерөнхий газрын албан хэрэгцээнд шаардлагатай тавилга, тоног төхөөрөмжийг худалдан авах байсан юм.

Засгийн газрын бараа үйлчилгээ худалдан авах тендерийг цахим хэлбэрт шилжүүлснээр тендерт оролцогч компаниуд цаг хугацаа, зардал хэмнэх, тендерт оролцогчид нүүр тулан уулзаж харилцаа үүсгэхгүй байх давуу талтай юм байна. Мөн олон сая төгрөгийн хэмнэлт гарах аж. Засгийн газар тендерийн материал бэлтгэн хүргүүлэхэд хоёр тэрбум, сонин хэвлэлээр зарлахад 400 сая төгрөг зарцуулдаг аж. Тендерт оролцогч аж ахуйн нэгжүүд тендерийн материал авах, бичиг баримт бүрдүүлэхэд дунджаар 1.5 сая төгрөг зарцуулдаг гэсэн тооцоо гарчээ.

Засгийн газрын бараа үйлчилгээ худалдан авах тухай хуульд өнгөрсөн жил нэмэлт өөрчлөлт оруулан 30 хувийг цахим хэлбэрээр худалдан авахаар тусгасан байна. Цахим тендерийн системийг нэвтрүүлэхэд БНСУ-ын Койка байгууллага дөрвөн сая орчим ам.долларын буцалтгүй тусламж, техникийн тусалцаа үзүүлсэн аж. Цахимаар тендер шалгаруулах мэдээллийн системийг боловсруулах ажлыг жил хагасын хугацаанд хийжээ.