Монгол Улсын төр, нийгмийн зүтгэлтэн, Монгол Улсын Хөдөлмөрийн баатар, Шинжлэх ухааны гавьяат зүтгэлтэн, ШУА-ийн анхны ерөнхийлөгч, академич Базарын Ширэндэвийн мэндэлсний 100 жилийн ой энэ онд тохиож буй. Ойг тэмдэглэн өнгөрүүлэх ажлын хүрээнд өнөөдөр 14.00 цагт түүний нэрэмжит гудамжийг нээх ёслол болох юм байна. Залгуулаад академич Б.Ширэндэвийн мэндэлсний 100 жилийн ойд зориулсан үзэсгэлэн болон 10 боть зохиолын нээлт Үндэсний музейд болно. Мөн МУИС-ийн хичээлийн II байрны урд талбайд түүний хөшөөний шав тавих ёслол болох ажээ.

Монгол Улсын Шинжлэх ухааны академийг үүсгэн байгуулсан гавьяатан, нэрт түүхч, академич Б.Ширэндэв нь Монголын шинжлэх ухааныг хөгжүүлэхэд үнэтэй хувь нэмэр оруулсан шинжлэх ухааны томоохон зүтгэлтэн байлаа. Тэрээр 1951-1954 онд МУ-ын Гэгээрүүлэх яамны сайдаар ажиллаж байсан юм. "БНМАУ-ын түүх" гурван боть  болон бусад олон шинжлэх ухаан, түүх, уран зохиол, эрдэм шинжилгээний зохиол бүтээл туурвижээ. Сансар судлалын Үндэсний зөвлөлийн дарга Б.Ширэндэв нь Шинжлэх ухааны томоохон ололт болох Монгол хүнийг сансарт нисгэх үйлст томоохон хувь нэмрээ оруулсан хүн билээ.