Олон улсын музейн өдрийг энэ жил “Шинэчлэгдсэн дэлхийн музей, шинэ өөрчлөлт, шинэ урам зориг” уриан дор тэмдэглэж байна. Монгол цэргийн музейгээс өнгөрсөн сард “Цэрэг эрсийн жирийн өдрүүд” тойрон аялалыг Улаанбаатар хотын музейнүүдийн дунд зохион байгуулж, Батлан хамгаалах бодлого зорилт, Зэвсэгт хүчний үйл ажиллагааг сурталчилсан байна. Харин саяхан БСШУЯ, Соёлын өвийн төв, Олон улсын музейн Монгол Улс дахь зөвлөл, Соёл урлагийн хороо, Дундговь аймгийн орон нутаг судлах музей хамтран Дундговь аймгийн Мандалговь хотод “Музейн аюулгүй байдал, орон нутгийн музейн тулгамдсан асуудал, соёлын өвийг баримтжуулах” зэрэг сэдвээр холбогдох мэргэжилтнүүдийн дунд сургалт зохион байгуулжээ.

Мандалговь хотын төрийн захиргааны байранд болсон уг сургалтанд төв, орон нутгийн 22 музейн ажилтан албан хаагчид хамрагдаж, үзмэр хадгалалт, сэргээн засварлалт, хадгалалт хамгаалалтын талаар санал хүсэлтээ илэрхийлж, шаардлагатай асуудалд хариулт авсан байна. Мөн энэхүү арга хэмжээний үеэр Монгол цэргийн музей аймгийн ЗДТГ-ын хамт олон, Зэвсэгт хүчний 065 дугаар ангийн 278 дугаар тусгай салбарын бие бүрэлдэхүүнд “Музей нүүж явна” хөтөлбөрөө танилцуулж, музейн үзмэрээ цахим танилцуулгаар сурталчилжээ.

Харин гурав хоног үргэлжилсэн сургалт семинарын дараа музейчдын дунд “Гар бөмбөгийн аварга” шалгаруулах тэмцээн болж, Дундговь аймгийн орон нутаг судлах музейн баг тэргүүн байр эзэллээ.